नागपूर - प्रणय ठाकरे या 21 वर्षीय तरुणाचा पतंगाच्या नायलॉन मांजामुळे गळा कापला गेल्यानंतर आता नायलॉन मांजाची विक्री आणि खरेदी करणाऱ्यां विरोधात पोलीस प्रशासन सक्रिय झाले आहे. आज (दि. 13 जाने.) पोलिसांनी नायलॉन मांजाची विक्री करणाऱ्यांवर कारवाई केली आहे. दिवसभरात 33 मांजा विक्रेत्यांवर कारवाई करण्यात आली आल्याची माहिती नागपूर शहराचे पोलीस आयुक्त अमितेश कुमार यांनी दिलेली आहे.
मकर संक्रांतीच्या काळात दोन विद्यार्थ्यांचा नाहक बळी गेल्यानंतर आज शहरात विविध ठिकाणी पोलीस कर्मचारी तैनात केले आहेत. जे नायलॉन मांजाची विक्री आणि वापर करताना आढळून आलेत त्यांच्यावर कारवाई करत असल्याचे त्यांनी सांगितले आहे. येणाऱ्या काळात ही कारवाई सुरूच राहणार असल्याचे देखील त्यांनी स्पष्ट केले आहे. त्यामुळे नागरिकांनी पतंग उडवण्यासाठी नायलॉन मांजा चा वापर करू नये, असे आवाहन त्यांनी केले आहे.
शहरात पोलीस बंदोबस्तात वाढ
प्रणय ठाकरे या तरुणाचा नायलॉन मांजामुळे नाहक बळी गेल्यानंतर पोलिसांना जाग आली असून नायलॉन मांजा वापरणाऱ्यांवरही कारवाई सुरू केली आहे. त्यानुसार आता शहारातील सर्व चौकांमध्ये पोलीस बंदोबस्त तैनात राहणार आहे. पेट्रोलिंगही केली जाणार असल्याचे पोलीस आयुक्त अमितेश कुमार यांनी स्पष्ट केले आहे. कोणी नायलॉन मांजाने पतंग उडवत असल्याची तक्रार आल्यास त्यांच्या टेरेसवर पोलीस जातील आणि शहानिशा केल्यानंतर संबंधित व्यक्तींवर कारवाई करतील, असे संकेत त्यांनी दिले आहेत.
हेही वाचा - चिकन नको रे बाबा.. मटण प्लेट लाव.. बर्ड फ्ल्यूमुळे चिकन विक्रेते, सावजी भोजनालयांना फटका
हेही वाचा - विशेष : प्लास्टिक पतंग अन् नायलॉन मांजामुळे पक्ष्यांच्या जीवितास धोक्याबरोबर प्रदूषणात वाढ
