नागपूर - शहरात कुत्र्यांचा हैदोस वाढला आहे. त्यामुळे, नागरिकांना त्रास होऊ लागला आहे. यासंदर्भांत वाढत्या तक्रारी पाहता महापालिकेने आता नवीन धोरण आणण्याचा विचार केला असून त्यानुसार एका घरात दोनच कुत्रे पाळता येणार आहेत. लवकरच याची अंमलबजावणी होईल.
नागपूर महापालिकेच्या हद्दीत बेवारस कुत्र्यांची संख्या मोठी आहे. जिकडे तिकडे यांचा हैदोस पाहायला मिळतो. यावर महापालिकेने उपाय योजना म्हणून नसबंदीचा कार्यक्रम आखला. मात्र, त्याचादेखील पाहिजे तसा फायदा झाला नाही. नागरिकांचा त्रास मात्र वाढतच आहे. सोबतच लोक घरगुती पाळीव कुत्र्यांनाही रस्त्यावर फिरायला नेतात. त्यांच्या ओरडण्याचा आवाज होतो. अशा अनेक तक्रारी महापालिकेकडे आल्या आहेत. यावर उपाय योजना म्हणून महापालिका आता पावले उचलण्याच्या तयारीत असून यासाठी नवीन धोरण आखले जात आहे.
या धोरणानुसार एका मालकाला आपल्या घरात दोनच्या वर कुत्रे पाळता येणार नाहीत. याची प्राथमिक तयारी झाली असून त्याला लवकरच मंजुरी दिली जाणार आहे. अनेक जण आपल्या घरी कुत्रे पाळतात, मात्र त्यांची योग्य ती निगा राखली जात नाही. यासोबतच त्यांना बाहेर सोडूनदेखील दिले जाते. यामुळे कुत्र्यांची रस्त्यावर संख्या वाढल्याचे पाहायला मिळते. अनेक ठिकाणी हेच अपघाताचे कारण सुद्धा ठरते. तर कुत्र्यांनी चावण्याचे प्रमाणसुद्धा वाढत आहे. याबद्दलच्या तक्रारी होत आहेत. त्यामुळे महापालिका ही उपाययोजना धोरण म्हणून अमलात आणण्याच्या तयारीत आहे.
