नागपूर: १६ एप्रिल रोजी नागपुरात आयोजित होणाऱ्या महाविकास आघाडीच्या सभेसाठी पूर्व नागपूर भागातील दर्शन कॉलनीचे मैदान देण्यास भाजपने विरोध केला आहे. हे मैदान खेळांसाठी राखीव असल्याने राजकीय सभेसाठी हे मैदान देण्याचा निर्णय रद्द करावा, अशी मागणी पूर्व नागपूरचे भाजप आमदार कृष्णा खोपडे यांनी केली आहे. तर ज्या अटींवर या मैदानाची परवानगी देण्यात आली आहे, त्या अटी पूर्ण करून याच मैदानावर महाविकास आघाडीची सभा होईल, अशी भूमिका महाविकास आघाडीने घेतली आहे.
16 एप्रिलला नागपुरात वज्रमुठ सभा: या सभेला माजी मुख्यमंत्री उद्धव ठाकरे यांच्यासह काँग्रेस व राष्ट्रवादीचे अनेक नेते उपस्थित राहणार आहेत. सभेसाठी दर्शन कॉलनी परिसरातील मैदान निश्चित करण्यात आले असून, नागपूर सुधार प्रन्यासने मैदानाची परवानगी देखील दिली आहे. आता नागपूर सुधार प्रन्यासने दिलेल्या परवानगीवर भाजपने आक्षेप घेतला आहे. ही परवानगी रद्द करण्याची मागणी भाजपने केली आहे. यासंबंधीचे पत्र भाजप आमदार कृष्णा खोपडे यांनी लिहिले आहे.
कृष्णा खोपडेच्या मतदारसंघातील मैदान: महाविकास आघाडीची सभा असलेले मैदान हे कृष्णा खोपडे यांच्या मतदार संघात येत. महाविकास आघाडीच्या मोठ्या नेत्यांची सभा मतदार संघात झाल्यास त्याचा परिणाम आगामी निवडणुकीवर होईल असा अंदाज व्यक्त करण्यात येत आहे. याच कारणामुळे कृष्णा खोपडे सक्रिय झाल्याची कुजबुज आहे. एकूणच सभेला दिलेली परवानगी रद्द करण्याची मागणी केल्यावर, आता नागपूर सुधार प्रन्यास काय भूमिका घेते हे पाहणे महत्त्वाचे ठरणार आहे.
भाजपचे धाबे दणाणले: गेल्या आठवड्यात संभाजीनगरात महाविकास आघाडीची वज्रमुठ सभा पार पडली. लोकांनी सभेला दिलेला प्रतिसाद बघता भारतीय जनता पक्षाचे धाबे दणाणले आहे. त्यामुळेच भाजपकडून विरोधाचे सूर काढले जात असल्याचा आरोप काँग्रेसचे प्रवक्ते संदेश सिंगलकर यांनी केला आहे. शहरातील कस्तुरचंद पार्क मैदान आणि यशवंत स्टेडियमवर राजकीय कार्यक्रम घेण्यास बंदी आहे. शहरात दुसरे मोठे मैदान नाही. दर्शन कॉलनी मधील मैदान कहाविकास आघाडीने निवडले. सभेसाठी आम्ही अटींचे पूर्ण पालन करू व सभा याच मैदानावर घेण्याची भूमिका महाविकास आघाडीने घेतली आहे.
इतिह कस्तुरचंद पार्क मैदान आरक्षित: नागपुरात आतापर्यंत सर्वच पक्षांच्या मोठ्या नेत्यांचा सभा कस्तुरचंद पार्क मैदानावर पार पडल्या आहेत. इंदिरा गांधी ते सोनिया गांधी,अटलबिहारी वाजपेयी, मायावती यांच्यापासून ते थेट पंतप्रधान नरेंद्र मोदी यांचाही समावेश आहे. परंतु कस्तुरचंद पार्कवर हेरिटेज वास्तू असल्याने आता राजकीय सभांसाठी हे मैदान देण्यात येत नाही. याचप्रमाणे यशवंत स्टेडियमवरदेखील राजकीय कार्यक्रमांना परवानगी दिली जात नाही.
