नागपूर - सर्व शिक्षा अभियानाचा मोठा गाजा-वाजा सुरु असताना देखील हजारो विद्यार्थी आजही शिक्षणापासून वंचित आहेत. शिक्षणाचे खासगीकरण जोरात सुरु असताना शासनाच्या शाळा त्याच वेगात बंद होत आहे. त्यामुळे गोर-गरीब विद्यार्थी शाळेचा उंबरठा देखील चढू शकत नसल्याचे भयाण वास्तव आज राज्याच्या प्रत्येक शहरात दिसून येत आहे. अशातच शिक्षणाची गोडी निर्माण करण्याचा वसा नागपुरातील बबिता मोटघरे यांनी घेतला आहे. सामाजिक जबाबदारी पूर्ण करण्यासाठी त्यांच्यामार्फत रस्त्यांवर भटकंती करणाऱ्या चिमुकल्यांना शिक्षणाचे धडे दिले जात आहे.
बबिता मोटघरे या शिक्षण क्षेत्रात कार्यरत नसून त्या एका मोठ्या कंपनीत एच.आर हेड आहेत. सामाजिक जबाबदारी पूर्ण करण्यासाठी त्यांच्याकडून हा प्रयत्न केला जात आहे. त्यांच्या प्रयत्नांमुळे अनेक मुले दहावीपर्यंतचे शिक्षण पूर्ण करून कॉलेजपर्यंत पोहचले आहेत. दिवसभर कार्यालयीन काम आटोपल्यानंतर त्या थेट घरी न जाता महाराजबाग मार्गावरील फुटपाथ गाठतात आणि तेथे आपली शाळा भरवतात. बबिता यांचे विद्यार्थीदेखील खास आहेत. त्यांच्या शाळेत फुलझाड आणि लहानमुलांची खेळणी विकणारी मुले येतात. त्यांच्या सहवासात बबिता इतक्या रमतात की त्यांना वेळेचे देखील भान राहत नाही. त्याचबरोबर विद्यार्थी देखील बबिता यांच्या सानिध्यात पुस्तकांमध्ये रमून जातात.
शिक्षणाचे दान हे सगळ्यात मोठे दान समजले जाते. शिक्षण प्रत्येक विद्यार्थ्यांपर्यंत पोहोचावे हा सरकारचा प्रयत्न असतो मात्र, काही लहान मुले या मूलभूत अधिकारापासून वंचित आहेत. अशा मुलांना शिक्षणाच्या प्रवाहात आणण्याचे काम बबिता आणि काही शिक्षित युवक-युवतींकडून शहरात केले जात असल्याचे दिसून येत आहे.
बबिता मोटघरे रस्त्यावरच विद्यार्थ्यांना शिक्षणाचे धडे गिरवित असल्याचे दृश्य जाणाऱ्या येणाऱ्यांचे देखील लक्ष वेधून टाकते. विद्यार्थ्यांच्या जीवनात ज्ञानाचा दिवा तेजोमय करण्याचा प्रामाणिक प्रयत्न करत बबिता यांच्याकडून केला जात आहे. बाहेर राज्यातून खेळणी आणि झुंबर विकायला येणाऱ्यांचे वास्तव्याचे नेमके ठिकाण नसल्याने त्यांची भटकंती सतत सुरु असते. त्यांच्या सोबत त्यांची मूल सुद्धा या गावातून फिरस्ती करतात. अशाच पाल्यांच्या चिमुकल्यांना शालेय शिक्षणाची गोडी निर्माण करण्यासाठी बबिता मोटघरेंनी यांच्याकडून ज्ञान दानाचे काम सुरू आहे. त्यांचे कार्य खूप कौतुकास्पद असून ते लोकांसाठी प्रेरणादाय देखील आहे.
