मुंबई : शिवसेनेतील फुटी नंतर रामदास कदम यांनी थेट पक्षप्रमुख उद्धव ठाकरे यांना आव्हान देण्यास सुरुवात केली. रामदास कदमांना शह देण्यासाठी शिवसेनेकडून माजी आमदार संजय कदम यांची घरवापसी करण्याच्या हालचाली सुरू झाल्या आहेत. संजय कदम आणि रामदास कदम हे एकमेकांचे हाडवैरी आहेत. त्यामुळे सेनेत प्रवेश देऊन रामदास कदम यांच्या सहित आमदार योगेश कदमांची कोंडी करण्याचा सेनेचा प्रयत्न आहे. लवकरच ते शिवसेना पक्षप्रमुख उद्धव ठाकरे यांच्या हस्ते शिवबंधन बांधून पक्षात प्रवेश करतील, अशी माहिती सूत्रांनी दिली.
रामदास कदमांची कोंडी ? : मुख्यमंत्री एकनाथ शिंदे यांनी चाळीस आमदारांचे शिवसेना पक्षप्रमुखांनी विरोधात सुरत मध्ये जाऊन बंड केला. कोकणातील सहा आमदारांनी शिंदे गटाची वाट धरली. दापोली - खेड- मंडणगड विधानसभा मतदारसंघातील विद्यमान आमदार योगेश कदम हे देखील शिंदे गटात गेले. योगेश कदम हे एकेकाळच्या शिवसेनेतील आक्रमक नेते रामदास कदम यांचे सुपुत्र आहेत. शिवसेनेत फूट पडल्यानंतर रामदास कदम यांनी थेट उद्धव ठाकरे यांना लक्ष्य करण्यास सुरुवात केली. तसेच ठाकरेंवर टोकाचे आरोप देखील केले. ठाकरेंकडून कदमांच्या आरोपांवर प्रतिक्रिया देणे टाळत आले. मात्र, आता थेट मतदारसंघातच रामदास कदमांची कोंडी करण्याची रणनीती आखली आहे.
संजय कदम ठाकरे गटात जाणार : दापोली - मंडणगड - खेड विधानसभा मतदारसंघ शिवसेनेचा बालेकिल्ला म्हणून ओळखला जातो. गेल्या वेळी येथे योगेश कदम निवडून आले. आता ते शिंदे गटात गेल्याने त्यांना तगडे आव्हान देण्यासाठी माजी आमदार आणि राष्ट्रवादीचे नेते संजय कदम हे ठाकरे गटात प्रवेश करणार आहेत. सन २०१४ मध्ये त्यांनी रामदास कदम यांना कंटाळून राष्ट्रवादी काँग्रेसमध्ये प्रवेश केला होता. राष्ट्रवादीच्या तिकीटावर ते आमदार झाले. परंतु, २०१९ च्या विधानसभा निवडणुकीत शिवसेनेच्या तिकीटवर योगेश कदम यांनी संजय कदम यांचा पराभव केला. आता शिवसेनेतील फुटीनंतर संजय कदम पुन्हा शिवसेनेत प्रवेश करणार आहेत. मूळचे शिवसैनिक असलेल्या संजय कदमांच्या घरवापसीमुळे ठाकरे गटाची मोठी ताकद वाढणार असून योगेश कदम यांच्यासाठी मोठे आव्हान असेल.
यांना बळ मिळेल : रामदास कदम यांच्या बंडखोरीने दापोली मतदार संघात शिवसेनेला खिंडार पडेल अशी शक्यता वर्तवली जात होती. मात्र, माजी केंद्रीय मंत्री अनंत गीते व माजी आमदार सूर्यकांत दळवी यांचा दांडगा जनसंपर्क असलेले नेते ठाकरेंच्या पाठीशी खंबीरपणे उभे राहिले आहेत. त्यात ठाकरे गटाच्या शिवसेनेचे येथे वर्चस्व कायम आहे. आता संजय कदम शिवसेनेत आल्यास पक्षाला अधिक बळ मिळण्यास मदत होणार आहे.
