मुंबई : पावसात अडकलेल्यांना सिद्धिविनायक मंदिरात निवारा, मंदिर प्रशासनाचा निर्णय

दादर प्रभादेवी भागातील ज्या चाकरमान्यांना घरी जाण्यासाठी अडचणी येत आहेत. अशा नागरिकांना सिद्धीविनायक मंदिर न्यासाकडून महाप्रसादाची व्यवस्था करण्यात आली आहे. तसेच रात्रभर थांबण्याचीही व्यवस्था करण्यात आल्याचे सिद्धीविनायक मंदिर न्यासचे अध्यक्ष आदेश बांदेकर यांनी सांगितले.

मुंबई - शहरातील अतिमुसळधार पावसामुळे जनजीवन विस्कळीत झाले आहे. रस्त्यावर जिकडे-तिकडे पाणीच पाणी साचले असून चाकरमान्यांचे हाल होत आहेत. बस, रेल्वे, लोकल ठप्प झाल्याने लोकांना अडचणींचा सामना करावा लागत आहे.

मुसळधार पावसामुळे मुंबई तुंबली असून पश्चिम रेल्वे विस्कळीत झाली असून नालासोपारा-वसई रुळावर पाणी साचल्याने अनिश्चित काळासाठी लोकल सेवा बंद झाली आहे. शहरातील विविध भागात पाणी साचल्याने अनेक ठिकाणचे ड्रेनेज तुंबले असल्याने पाण्याचा निचरा थांबला आहे. त्यामुळे, हे पाणी थेट नागरिकांच्या घरात आणि दुकानात शिरले आहे.

हेही वाचा - मुंबईतील पावसामुळे लांब पल्ल्यांच्या गाड्या रद्द, तर काही गाड्यांच्या मार्गात व वेळेत बदल

या अडचणींमध्ये सिद्धीविनायक मंदिराकडून अडचणीत सापडलेल्यांकरिता मदतीचा हात पुढे करण्यात आला आहे. दादर प्रभादेवी भागातील ज्या चाकरमान्यांना घरी जाण्यासाठी अडचणी येत आहेत. अशा नागरिकांना सिद्धीविनायक मंदिर न्यासाकडून महाप्रसादाची व्यवस्था करण्यात आली आहे. तसेच रात्रभर थांबण्याचीही व्यवस्था करण्यात आल्याचे सिद्धीविनायक मंदिर न्यासचे अध्यक्ष आदेश बांदेकर यांनी सांगितले.