मुंबई : मुंबई गोवा महामार्ग आणि त्याचे चौपदरीकरण हा अत्यंत कळीचा मुद्दा बनला आहे. अनेक वर्षांपासून या रस्त्याचे काम सुरू असले तरी हा रस्ता अद्यापही पूर्ण झालेला नाही. कोकणातील दिग्गज मंत्री, खासदार, आमदार, केंद्रीय मंत्री यांनी या रस्त्याबाबत अनेकवेळा पाठपुरावा करूनही विविध अडचणींमुळे हा रस्ता अद्यापही पूर्ण होऊ शकलेला नाही. मात्र आता या रस्त्याचे काम अंतिम टप्प्यात आले असून डिसेंबर २०२३ पर्यंत हा रस्ता पूर्ण होईल, असा दावा राज्याचे बांधकाम मंत्री रवींद्र चव्हाण यांनी केला आहे.
गणेशोत्सवापूर्वी एक मार्ग सुरू : या रस्त्याचे काम अद्याप पूर्ण झाले नसले तरी गणेशोत्सवासाठी कोकणात जाणारे भाविक या मार्गावरून मोठ्या संख्येने प्रवास करतात. अशा भाविकांना किमान यावर्षी तरी या रस्त्याचा एक मार्ग वापरता यावा यासाठी आम्ही प्रयत्नशील असून लवकरच एक मार्ग सुरू करण्यात येणार असल्याची माहिती चव्हाण यांनी दिली.
महामार्गाच्या कामात तांत्रिक अडचणी : महामार्गाचे काम लवकरात लवकर पूर्ण व्हावे, अशी प्रत्येकाची इच्छा असल्याने राज्य सरकार केंद्र सरकारच्या रस्ते विकास विभागाशी संपर्क साधण्याचा प्रयत्न करत आहे. याबाबत केंद्रीय मंत्री नितीन गडकरी यांच्याशी वारंवार चर्चा होत आहे, मात्र कंत्राटदार बँका, लाभार्थी अशा अनेक अडचणींमुळे काम रखडले आहे. कामांमध्ये अनेक तांत्रिक अडचणी आल्या आहेत, मात्र त्या दूर करण्याचा आमचा प्रयत्न असल्याचेही चव्हाण म्हणाले. भूसंपादनाची सर्व कामे पूर्ण झाली असून सर्व लाभार्थ्यांना पैसे वाटप करण्यात आले आहेत.
पावसाळ्यात सुरू राहणार काम : दरवर्षी पावसाळ्यामध्ये काम होत नाही. यंदाही पावसाळ्यामध्ये काम झाले नाही तर काम पूर्णत्वास जाणार नाही. म्हणून लोकप्रतिनिधी अधिकारी यांना आम्ही सांगितले आहे की असे तंत्रज्ञान वापरा जे प्रत्येक 200 फूट कामाचे रुपींग करता येईल. असे झाल्यास काँक्रीटिटी करण्याच्या कामावर किमान 12 तास पाणी पडले नाही तर ते योग्य राहते. त्यामुळे असे छप्पर टाकून काम करण्याचा प्रयत्न करावा अशा सूचना आम्ही दिल्या.
मुंबई गोवा महामार्गावर पुस्तक लिहिणार : मुंबई गोवा महामार्गामध्ये येत असलेल्या अडचणी, महामार्गाच्या कामांमध्ये कोणामुळे खंड पडला, महामार्गाचे काम करताना कोण असाह्य झाले, निधीची कमतरता किंवा अन्य गोष्टी होत्या का, नेमक्या काय अडचणी होत्या याबाबत आपण एक पुस्तक लिहिणार आहे. त्यात अनेक खुलासे असतील असेही चव्हाण यांनी यावेळी सांगितले.
हेही वाचा - Monsoon in Maharashtra : आनंदाची बातमी! महाराष्ट्रात मान्सून सक्रिय; मुंबईसाठी यलो अलर्ट
