मुंबई - अभिनेत्री कंगना रणौत प्रकरणावरुन महाराष्ट्राचे गृहमंत्री अनिल देशमुख यांना हिमाचल प्रदेशमधून धमकीचे फोन येत असल्याची धक्कादायक माहिती समोर आली आहे. या वृत्ताला खुद्द अनिल देशमुख यांनीच दुजोरा दिला आहे.
धमकी देणाऱ्या व्यक्तींनी गृहमंत्री अनिल देशमुख यांना कंगना रनौतपासून दूर राहण्यास सांगितले. तसेच कंगनाविरोधातील कारवाई थांबवण्याची सूचना केली. आम्ही जे सांगतो आहे ते आत्ताच लक्षात घ्या आणि सुधरा, नाही तर परिणाम वाईट होतील, असे धमकी देणाऱ्या व्यक्तींकडून सांगण्यात येत असल्याचे समजते.
बुधवारी सकाळी सहा वाजता अनिल देशमुख यांना धमकीचे दोन फोन कॉल आले. त्याआधी तीन फोन कॉल आले असून, यातील एक फोन अनिल देशमुख यांच्या नागपूर कार्यालयात करण्यात आला होता. तर दोन फोन कॉल हे मुंबईतील कार्यालयात करण्यात आले आहेत. यासंदर्भात मुंबई पोलिसांनी तातडीने तपास सुरू केला आहे.
दरम्यान, कंगना मुंबईबद्दल सतत वादग्रस्त वक्तव्य करत आहे. यामुळे तिची चौफेर कोंडी करण्यात येत असल्याचे पाहायला मिळत आहे. पाली हिल येथे असलेल्या कंगनाच्या कार्यालयात अनधिकृत बांधकाम केल्याचे सांगत मुंबई महापालिकेने नोटीस पाठवली. त्यानंतर आज त्या कार्यालयात तोडक कारवाई करण्यात आली. तत्पूर्वी ती ड्रग्ज घेत असल्याचा आरोप करण्यात आला आहे. तसेच कंगनाविरोधात विधानसभेत हक्कभंग दाखल करण्यात आला आहे.
हेही वाचा - रोहित्राचा स्फोट : एकाच कुटुंबातील तिघांचा मृत्यू; महावितरण अधिकाऱ्यांवर गुन्हा दाखल
हेही वाचा - ..अखेर कंगनाच्या बेकायदेशीर बांधकामावर पालिकेचा हातोडा, आता लक्ष न्यायालयाकडे
