मुंबई : कोरोना काळात अनेक डॉक्टर आणि नर्स सेवा न देता पळून गेले. या वादग्रस्त वक्तव्यावर इंडियन मेडिकल असोसिएशन आक्रमक झाली असून, राज्यभर संजय राऊत यांच्या विरोधात निदर्शने करण्याचा इशारा त्यांच्याकडून देण्यात आला आहे. मात्र, आपल्या या वक्तव्यावर संजय राऊत यांनी सारवासारव केली आहे. संजय राऊत यांनी केलेल्या विधानावर इंडियन मेडिकल असोसिएशन चांगलीच आक्रमक झाली आहे.
इंडियन मेडिकल असोसिएशन आक्रमक प्रसारमाध्यमांशी मुंबईत संवाद साधताना कोविड काळामध्ये अनेक डॉक्टर, नर्स सेवा न देताच पळून गेले असे वादग्रस्त वक्तव्य संजय राऊत यांनी केले होते. त्यांच्या या वक्तव्यावर इंडियन मेडिकल असोसिएशन आक्रमक झाली असून, संजय राऊत जोपर्यंत हे विधान मागे घेऊन माफी मागत नाही, तोपर्यंत संघटना शांत बसणार नाही. संपूर्ण राज्यभर संजय राऊत यांच्या विरोधात निदर्शने केली केली जातील, असा इशारा इंडियन मेडिकल असोसिएशनने दिला आहे. मात्र, आता संजय राऊत यांनी केलेल्या या वक्तव्यावर आज मुंबई प्रसारमाध्यमांशी संवाद साधताना सारवासराव करण्याचा प्रयत्न केला.
संजय राऊत यांचा वादावर पडदा टाकण्याचा प्रयत्न आपण डॉक्टरांच्या विरोधात कोणतेही वादग्रस्त वक्तव्य केलेले नाही. कोरोना काळात सर्वच डॉक्टरांनी जे काम केले आहे, त्याची तुलना करता येणार नाही. त्यावेळी पांढऱ्या कपड्यातले ते देवदूत होते, असे विधान आता संजय राऊत यांनी केले आहे. संजय राऊत यांनी केलेल्या वादग्रस्त वक्तव्यावर पडदा टाकण्याचा प्रयत्न केला असला तरी, आता इंडियन मेडिकल असोसिएशन यासंदर्भात नेमकी कोणती भूमिका घेणार याकडे सर्वांचे लक्ष लागलेले आहे.
इंडियन मेडिकल असोसिएशनकडून निषेध संजय राऊत यांनी डॉक्टरांबाबत केलेल्या वादग्रस्त वक्तव्यानंतर संपूर्ण राज्य इंडियन मेडिकल असोसिएशनने निदर्शन करण्याचा निर्णय घेतला होता. यामध्ये २५० संघटनांसहित पन्नास हजार डॉक्टर सामील होतील, अशी माहिती इंडियन मेडिकल असोसिएशनकडून देण्यात आली होती. कोरोना काळात डॉक्टरांनी दिलेल्या सेवेसाठी त्यांना कोणतेही विशेष मानधन देण्यात आले नाही. मात्र, तरी या परिस्थितीत त्यांनी आपले कर्तव्य अगदी जबाबदारपणे पार पाडले असल्याचे इंडियन मेडिकल असोसिएशनकडून सांगण्यात आले आहे.
कोविड काळातसुद्धा संजय राऊत यांचे डाॅक्टरांबाबत वादग्रस्त वक्तव्य याआधी कोविड काळात प्रसारमाध्यमांशी संवाद साधताना संजय राऊत यांनी डॉक्टरांबाबत वादग्रस्त वक्तव्य केले होते. आपण आजारी पडल्यास डॉक्टरकडे नाही. तर, कंपाउंडरकडे जातो. कंपाउंडर योग्य गोळ्या देत असतात. आजाराबाबत डॉक्टरांपेक्षा कंपाउंडरला जास्त माहिती असते, असे वादग्रस्त वक्तव्य याआधी संजय राऊत यांनी केले होते. त्यांच्या या वक्तव्यावरदेखील डॉक्टरांकडून नाराजी व्यक्त करण्यात आली होती. त्यानंतर आता पुन्हा एकदा संजय राऊत यांनी थेट कोरोना काळात डॉक्टरांनी केलेल्या सेवेवरच प्रश्नचिन्ह उपस्थित केले आहे. त्यामुळे इंडियन मेडिकल असोसिएशन पुन्हा एकदा त्यांच्या वक्तव्याची गंभीर दखल घेत राज्यभर त्यांच्या विरोधात निदर्शन करण्याचा इशारा दिला आहे.
हेही वाचा : PM Modi Mumbai Visit : पंतप्रधांनाच्या बीकेसी येथील सभेसाठी शिंदे गट आणि भाजपकडून जय्यत तयारी सुरू
