मुंबई - कॉमेडियन भारती सिंह आणि पती हर्षला फोर्ट न्यायालयाने 14 दिवसांची न्यायालयीन कोठडी सुनावली आहे. भारती आणि हर्ष यांच्यावर ड्रग्ज घेतल्याचा आरोप आहे. भारती आणि हर्ष यांना मुंबई फोर्ट कोर्टात आणण्यात आले होते. त्यानंतर त्यांना न्यायालयीन कोठडी सुनावण्यात आली आहे. दोघांनीही जामिनासाठी अर्ज केला आहे, उद्या त्याच्यावर सुनावणी होणार असल्याची माहिती एनसीबीची वकील सरपांडे यांनी दिली.
भारती सिंह आणि हर्ष यांना ड्रग्सप्रकरणी एनसीबीने अटक केली होती. या दोघांनाही 14 दिवसांची म्हणजेच 4 डिसेंबरपर्यंत न्यायालयीन कोठडी देण्यात आली आहे. भारती आणि हर्षवर कलम 20 B आणि कलम 27 लावण्यात आली आहेत. 27A म्हणजेच ड्रग संबंधित आर्थिक व्यवहार किंवा देवाणघेवाण किंवा ड्रग्समधून आर्थिक नफा मिळवणे असे, या आरोपातून त्यांची सुटका झाली आहे. एनसीबीची वकील अतुल सरपांडे यांनी याबाबतची माहिती दिली आहे.
भारती सिंह आणि तिचा पती हर्ष लिंबाचियाला आज रुग्णालयात नेण्यात आले होते. त्यांची वैद्यकीय चाचणी करण्यात आली. त्यांच्याबरोबर इतर दोघांचीही चाचणी करण्यात आली. कोरोना चाचणीही करावयाची असल्याने एकूणच वैद्यकीय चाचणीला वेळ लागला होता, असे आमच्या प्रतिनिधीने कळवले आहे. एनसीबीचे झोनल डायरेक्टर समिर वानखेडे यांनी ही माहिती दिली. त्यानंतर त्यांना आता पोलिसांनी न्यायालयासमोर हजर केले . यावेळी न्यायालयाने दोघांना न्यायालयीन कोठडी सुनावली. दुसरीकडे भारतीने जामिनासाठी अर्ज केला आहे. त्यावर उद्या सुनावणी होईल. यापूर्वी अभिनेता अर्जुन रामपाल, दीपिका पदुकोन, सारा अली खान, फिरोज नाडियाडवाला यांचीही एनसीबीकडून चौकशी करण्यात आली आहे.
शनिवारी एनसीबीने मुंबईत अनेक छापे टाकले होते. तामध्ये एनसीबीने प्रसिद्ध कॉमेडियन भारती सिंगच्या घरी चौकशी केली. यावेळी एनसीबी अधिकाऱ्यांना भारतीसिंह यांच्या फ्लॅटमधून ड्रग मिळाले. त्यानंतर त्यांना चौकशीसाठी हजर राहण्याचे समन्स बजावण्यात आले होते. त्यानंतर भारती व पती हर्ष दोघेही एनसीबी कार्यालयात पोहोचले होते. कित्येक तास चौकशी केली असता भारतीसिंह यांना अटक करण्यात आली. तिच्या पतीलाही अटक करण्यात आली आहे.
भारतीच्या घरात 86 ग्रॅम गांजा
शनिवारी रात्री भारतीची आई आणि तिचा मित्र तिला भेटण्यासाठी एनसीबी कार्यालयात आले. भारतीला काही औषधे देण्यासाठी येत असल्याचे सांगण्यात आले. त्यांना विचारल्यानंतरही त्यांनी कोणत्याही प्रश्नांची उत्तरे दिली नाही. भारती सिंहच्या घरात 86 ग्राम गांजा आढळलायासंदर्भात बोलताना एनसीबीचे झोनल डायरेक्टर समीर वानखेडे म्हणाले, की ड्रग्स आढळून आल्याने कॉमेडियन भारती आणि तिचा पती हर्ष यांना ताब्यात घेण्यात आले. त्यापूर्वी त्यांच्या घराची झाडाझडती करण्यात आली. यावेळी हे ड्रग्स आढळून आले आहे.
हेही वाचा - चेन्नई : काँग्रेससह द्रमुकवर अमित शाह यांची जोरदार टीका; म्हणाले...
कोण आहे भारती सिंह?
भारती सिंह ही स्टॅण्डअप कॉमेडियन आणि अभिनेत्री आहे. तीचा जन्म 3 जुलै 1980 मध्ये झाला होता. ती पंजाबमधील असून तीने 2017 मध्ये लेखक हर्ष लिंबचियासोबत लग्न केले होते. तिने आपल्या कारकीर्दीची सुरुवात 'इंडियन लाफ्टर चॅलेन्ज'मधून केली होती. त्यातील तीचे लल्ली हे पात्र फारच प्रसिद्ध झाले होते. भारती सिंहने कॉमेडी सर्कस, कॉमेडी सर्कस महासंग्राम, कॉमेडी सर्कस का जादू, कहानी कॉमेडी सर्कस की आणि कॉमेडी नाईट्स बचाओ, जुबली कॉमेडी सर्कस मध्ये काम केले आहे. तसेच तिने प्यार में ट्विस्ट मध्येही काम केले आहे. याचबरोबर तीने अनेक कार्यक्रमांचे निवेदन केले आहे.
हेही वाचा - कार्तिकी वारी पंढरपूरमध्ये एसटी बससेवेला सशर्त परवानगी, खासगी वाहनांना मात्र बंदी
