भोकरदन (जालना) - भारत-चीन सीमेवर दोन्ही देशांच्या सैन्यामध्ये २० भारतीय जवानांना वीरमरण आले. या जवानांना जालन्यातील युवक काँग्रेसतर्फे श्रद्धांजली वाहण्यात आली. यावेळी चीन सरकार विरोधात घोषणाबाजी करण्यात आली, तर 'वीर जवान अमर रहे'च्या घोषणा देण्यात आल्या.
सरकारने याविषयी ठोस निर्णय घेतल्यास आम्ही सरकारसोबत आहोत, असे युवक काँग्रेस जिल्हा अध्यक्ष राहुल देशमुख यांनी सांगितले. मात्र, सरकार ज्या पद्धतीने सत्य परिस्थिती लपवत आहे ते निंदनीय आहे. पंतप्रधान नरेंद्र मोदींनी तत्काळ याबद्दल खुलासा करावा, अशी मागणी यावेळी करण्यात आली. तसेच खंबीर निर्णय घेण्याची क्षमता नसल्यास पंतप्रधानांना या पदावर राहण्याचा नैतिक अधिकार आहे का? असा सवालही त्यांनी उपस्थित केला.
हेही वाचा - ओडिशातील जगन्नाथ पुरी येथील वार्षिक रथयात्रेला सर्वोच्च न्यायालयाची स्थगिती
यावेळी नगरसेवक रमेश जाधव, रोशन देशमुख, वसीम शेख, सोपान सपकाळ, प्रकाश देशमुख, महेश दसपुते, रफिक कादरी, सद्दाम मिर्झा, शेख जावेद आदींची उपस्थिती होती.
शिवसेनेतर्फेही चीनचा निषेध -
भोकरदन शहरातील शिवाजी महाराजांच्या पुतळ्याजवळ शिवसेना आणि स्व. बाळासाहेब ठाकरे स्मृती परिवारच्या वतीने वीरमरण आलेल्या जवानांना श्रद्धांजली अर्पण करण्यात आली.
यावेळी चीन विरोधात घोषणा बाजी करत चीनचे राष्ट्राध्यक्ष शी जिनपिंग यांच्या बॅनरही जाळत निषेध व्यक्त करण्यात आला. यावेळी स्व. बाळासाहेब ठाकरे स्मृती परिवारचे महेश पुरोहित म्हणाले, भारताचे पंतप्रधान नरेंद्र मोदींनी चीन वस्तूवर बंदी घालावी.
यावेळी सुरेश तळेकर, माजी सैनिक बबन शिंदे, पंजाबराव पवार, रामचंद्र गायके, अशोक जाधव, वामन जंजाळ, अंबादास मोरे, संजय दळवी, अमोल शिंदे, सुरेश कचके आदी उपस्थित होते.
