महिलेच्या घरातील कपाटमधून दोन धारदार शस्त्र जप्त

एका महिल्या घरातून एक तलवार व एक खंजीर जप्त करण्यात आली आहे. याबाबत चंदनझिरा पोलीस ठाण्यात गुन्हा दाखल झाला आहे.

जालना - चंदनझिरा पोलीस ठाण्यांतर्गत एका महिलेच्या घरातून पोलिसांनी दोन धारदार शस्त्र जप्त केली आहेत. महिलेच्या घरातून तलवार आणि खंजीर जप्त करण्यात आली आहेत. शारदाबाई महादू कांबळे (वय 30 वर्षे, रा. सुंदर नगर), असे ताब्यात घेतलेल्या महिलेचे नाव आहे.

कपाटात ठेवली होती शस्त्रे

याबाबत पोलिसांकडून मिळालेली अधिक माहिती अशी, सुंदर नगर येथील पवार गोडाऊन गल्ली भागातील एका महिलेच्या घरी आज (दि. 4 नोव्हेंबर) छापा मारला. या छाप्यामध्ये महिलेने कपाटात लपवून ठेवलेली दोन शस्त्रे सापडली. यामध्ये 48 सेंटीमीटर लांब असलेली आणि लाल रंगाच्या मॉनमधील एक धारदार तलवार आणि काळा पांढऱ्या रंगाच्या म्यानमध्ये ठेवलेले 35 सेंटीमीटर लांबीचे एक खंजीर पोलिसांना सापडले. याविषयी महिलेकडे अधिक चौकशी केली असता दुसऱ्या एका व्यक्तीने ही शस्त्रे ठेवण्यासाठी सांगितली असल्याचे सांगितले.

दुसरा आरोपी फरार

ज्या महिलेच्या घरात ही शस्त्रे सापडली त्या महिलेने दुसऱ्या एका आरोपीचे नाव घेतले आहे. त्यामुळे पोलिसांनी या आरोपीचा ही शोध घेतला असता तो सध्या फरार झाला आहे. लवकरच त्यालाही शोधून ताब्यात घेतले जाईल, अशी माहिती पोलिसांनी दिली.

यांनी केली कारवाई

पोलीस उपनिरीक्षक प्रमोद बोडले, पोलीस कर्मचारी अनिल काळे, दिनेश बडवणे, साई पवार, महिला पोलीस कर्मचारी रेखा वाघमारे, श्रद्धा गायकवाड यांच्या पथकाने ही कारवाई केली.

हेही वाचा - राजुरेश्वर गणपती मंदिर भक्तांविना सुनेसुने; भाविक प्रवेशद्वारातच टेकत आहेत माथा