जळगाव - दिवाळी आली की सर्वात आधी आठवण येते रोशणाईची. यासाठी जवळपास ४५ प्रकारच्या लाइट्स आणि दिव्यांच्या माळा तसेच अन्य सामग्री बाजारात दाखल झाली आहे. दिवाळी सात दिवसांवर आल्याने नागरिकांची साहित्य खरेदीसाठी गर्दी होत आहे. यंदा गोल्डन दिवे अन् झुंबरला जास्त पसंती मिळत आहे.
दिवाळी म्हणजे दिव्यांचा उत्सव, चैतन्याचा, आनंदाचा, समतेचा उत्सव. मांगल्याचे प्रतीक असलेले दिवे या दिवसांत घराबाहेर पणत्या, आकाशकंदील लावले जातात. सगळीकडे प्रकाशच प्रकाश असतो. घराला आकर्षक अशा लाइटिंगच्या माळींनी सजवले जाते. काही वर्षांपूर्वीपर्यंत छोटे इलेक्ट्रिशियन्सच दिव्यांची माळ तयार करून ते विकत होते. पण त्यानंतर दहा वर्षांपासून चायजीन दिवे आले. या चायनीज दिव्यांच्या माळेला मागील चार-पाच वर्षांपासून जोरदार मागणी आहे. या मागणीमुळे देशी पारंप‌रिक माळा तयार करणाऱ्यांचा व्यवसायच बुडाला होता. आता सध्या भारत-चीन यांच्यातील कटू संबंधांमुळे रोष व्यक्त केला जात आहे. देशी बनावटीच्या साहित्याची विक्री यंदा वाढली आहे, हे विशेष.
फुलांच्या एलइडी माळा
५० ते १०० बाबाच्या माळा, फ्रेडकला, पारलाइट्स, झालर, मोर, चक्र यांसारख्या नावीन्यपूर्ण वस्तूंनी बाजारपेठ सजली आहे. यंदा भारतीय बनावटीच्या वस्तू खरेदी करण्यावर ग्राहकांचा भर असून, लायटिंग मार्केटमधील चिनी वस्तूंकडे ग्राहकांनी पाठ फिरवली आहे. कापडी लॅम्पही विविध आकारात व रंगसंगतीनुसार उपलब्ध आहेत.
झुंबरमध्ये लावा मेणबत्ती
बाजारात सध्या स्वदेशी माळा ८० रुपयांपासून ते ४०० रुपयांपर्यंत उपलब्ध आहेत. तर गोल्डन झुंबर हे १०० रुपयांपासून २५०० रुपयांपर्यंत विक्रीस आहे. दिसायला अत्यंत आकर्षक असल्याने गृहिणींच्या या झुंबरला अधिक पसंती आहे. हे झुंबर दोन प्रकारचे आहे. एक मेणबत्ती लावता येणारे तर दुसरे लाइटिंग असलेले आहे. सर्वाधिक विक्री ही लाइटिंग असलेल्या ६ झुंबरच्या माळांना मिळत आहे.
