जळगाव - विधानसभा निवडणुकीसाठी जळगाव जिल्हा प्रशासन सज्ज आहे. यावेळी जिल्ह्यातील 11 विधानसभा मतदारसंघातील पुरुष व महिला मतदार मिळून 34 लाख 47 हजार 148 मतदार मतदानाचा हक्क बजावणार आहेत, अशी माहिती जिल्हाधिकारी डॉ. अविनाश ढाकणे यांनी पत्रकार परिषदेत दिली.
विधानसभा निवडणुकीची आचारसंहिता लागू झाल्यानंतर सायंकाळी जिल्हाधिकाऱ्यांनी पत्रकार परिषद घेऊन पूर्वतयारीची सविस्तर माहिती दिली. डॉ. ढाकणे पुढे म्हणाले, जळगाव जिल्ह्यातील 11 विधानसभा मतदार संघात 17 लाख 96 हजार 326 पुरुष तर 16 लाख 50 हजार 729 स्त्री व इतर 93 असे एकूण 34 लाख 47 हजार 148 मतदार आहेत. त्यात 7 हजार 846 सैनिक मतदार तसेच 14 हजार 852 दिव्यांग मतदार आहेत. जिल्ह्यातील एकूण 3 हजार 586 मतदान केंद्रांवर मतदानाची प्रक्रिया पार पडणार आहे. मतदानाची प्रक्रिया यशस्वीरित्या पार पाडण्यासाठी 6 हजार 513 मतदान यंत्र (बॅलेट युनिट), 44 हजार 430 कंट्रोल युनिट तर 4 हजार 882 व्हीव्हीपॅट यंत्रे प्रशासनाकडे उपलब्ध आहेत. 21 सप्टेंबरपासून निवडणुकीची आदर्श आचारसंहिता संपूर्ण जिल्ह्यात लागू झालेली असल्याने विधानसभा सार्वत्रिक निवडणूक भयमुक्त व पारदर्शक पद्धतीने पार पाडण्यासाठी उमेदवारांनी आदर्श आचारसंहितेचे काटेकोरपणे पालन करावे. आचारसंहितेचे उल्लंघन केल्यास तात्काळ गुन्हे दाखल करण्यात येणार असून यासाठी आचारसंहिता पथके तयार करण्यात आली आहेत, असेही जिल्हाधिकाऱ्यांनी सांगितले.
टोल फ्री दूरध्वनी क्रमांकावर मिळणार माहिती
संपूर्ण प्रक्रियेवर नियंत्रण ठेवण्यासाठी विविध कक्ष प्रमुखांच्या नियुक्त्या करण्यात आल्या आहेत. 1950 या टोल फ्री दूरध्वनी क्रमांकावर मतदारांना निवडणुकीविषयी माहिती उपलब्ध करुन देण्यात येणार आहे. निवडणूक कामकाजासाठी आवश्यक असलेले मनुष्यबळ पुरेसे उपलब्ध आहेत. त्यांच्या नियुक्तीही करण्यात आल्या असूनही प्रशिक्षण देखील देण्यात आले आहेत.
गुन्हेगारांना पाठबळ देणाऱ्यांवर कारवाई
मतदारांना आपला मतदानाचा हक्क निर्भयपणे बजावता येण्यासाठी पुरेशी सुरक्षा यंत्रणा सक्रीय करण्यात आली असून पोलीस विभागाने प्रतिबंधात्मक कार्यवाही हाती घेतली आहे. गुन्हेगारांना पाठबळ देणाऱ्यांवर कारवाई करण्यात येणार असल्याची माहिती यावेळी पोलीस अधीक्षक डॉ. पंजाबराव उगले यांनी दिली. यावेळी उप जिल्हा निवडणूक अधिकारी तुकाराम हुलवळे, निवासी उपजिल्हाधिकारी वामनराव कदम, तहसीलदार बाबासाहेब गाढवे, नायब तहसीलदार आनंद कळसकर उपस्थित होते.
