हिंगोली - सेनगाव तालुक्यातील नानसी येथे १५ वर्षीय बालकाची हत्या करण्यात आली होती. या प्रकरणी पोलिसांनी पंचनामा करून आकस्मिक मृत्यूची नोंद केली होती. मात्र, प्रयोगशाळेतून आलेल्या शवविच्छेदन अहवालात या बालकाचा गळा दाबून खून केल्याचे निष्पन्न झाले आहे. तब्बल तीन महिन्यानंतर ही घटना पोलिसांच्या तपासात उघड झाली आहे. शेख अरबाज शेख हुसेन (१५, रा. मंझरी जि. बीड) असे मृताचे नाव आहे.
किरण विठ्ठल सुखासे (१५, रा. नानसी) असे आरोपीचे नाव आहे. आरोपी किरण, साक्षीदार नितीन वाकळे आणि शेख अरबाज हे बामणी शिवारात असलेल्या पूर्णा नदी परिसरात ३० मे रोजी शेळ्या चरण्यासाठी गेले होते. मात्र, या ठिकाणी आरोपी किरण आणि अरबाज या दोघांमध्ये शेळ्या चरण्याच्या किवा इतर कारणावरून कडाक्याचे भांडण झाले. यामध्ये आरोपी किरणने शेख अरबाजचा गळा दाबून खून केला होता. मात्र, या प्रकरणी सेनगाव पोलिसांनी पंचनामा करून आकस्मिक मृत्यूची नोंद केली होती.
या प्रकरणाचा पोलीस निरीक्षक सरदारसिंह ठाकूर कसून तपास करीत होते. मात्र, आता प्रयोगशाळेतून आलेल्या शव विच्छेदन अहवालात अरबाजचा गळा दाबून खून केल्याचे निष्पन्न झाले आहे. त्याचबरोबर शेळ्या राखण्यासाठी गेलेल्या मुलाने देखील मी स्वतः डोळ्याने ही घटना पाहिली असल्याची साक्ष दिली आहे. त्यामुळे आता या घटनेत सरदारसिंह ठाकूर यांच्या फिर्यादीवरून आरोपी विरुद्ध खुनाचा गुन्हा दाखल करण्यात आला आहे. दरम्यान, या घटनेमुळे परिसरात चांगलीच खळबळ उडाली आहे.
या घटनेनंतर शव विच्छेदन अहवाल किती महत्त्वाचा असतो याची प्रचिती झाली आहे. यामुळे आरोपी आणि मृतामध्ये नेमके कोणत्या कारणावरून भांडण झाले होते याचा उलगडा होणार आहे. सेनगाव पोलीस आरोपीच्या शोधासाठी आरोपीच्या घरी गेले होते. मात्र, आरोपीच्या घराला कुलूप असल्याचे आढळून आले. गावात व इतर ठिकाणी शोध घेतला असता आरोपी कुठेच न मिळाल्याने पोलीस पथक रिकाम्या हाती परतले.
