हिंगोली - शालेय शिक्षण मंत्री तथा हिंगोली जिल्ह्याच्या पालकमंत्री वर्षा गायकवाड यांच्या उपस्थितीत जिल्हा परिषदेच्या शाळेत संविधानाच्या उद्देशिकेचे वाचन करण्यात आले. या उपक्रमाची सुरुवात हिंगोली जिल्ह्यातून झाली असून आता प्रार्थनेच्या वेळी नियमितपणे संविधानाच्या उद्देशिकेचे वाचन होणार आहे.
राज्य शासनाच्यावतीने 'सार्वभौमत्व संविधानाचे, जनहित सर्वांचे', हा उपक्रम सुरू करण्यात आला आहे.
शालेय शिक्षण मंत्री तथा हिंगोली जिल्ह्याच्या पालकमंत्री वर्षा गायकवाड यांनी त्या उपक्रमाची प्रत्यक्ष सुरुवातही हिंगोली येथील हिंगोली जिल्हा परिषद कन्या प्रशाला येथून केली. या उपक्रमासाठी मोठ्या प्रमाणात विद्यार्थी, नागरिक आणि अधिकारी उपस्थित होते. संविधानाची मूल्य बालमनावर रुजविण्यासाठी हा उपक्रम आता दररोज प्रार्थनेच्या वेळी राबविण्यात येणार असल्याचा निर्णय शासनाच्यावतीने घेण्यात आला आहे.
हेही वाचा - चव न चाखताच हिंगोलीत पालकमंत्र्यांनी केले शिवभोजन थाळीचे उद्घाटन
तसेच जिल्ह्यातील शैक्षणिक मागासलेपण दूर करण्यासाठी वैद्यकीय महाविद्यालय आणि अन्य उपक्रमही हाती घेण्यात येणार आहेत. पुन्हा एकदा या जिल्ह्याचे नेतृत्व करण्याची संधी मिळाल्याने नेमकी कोणती विकासाची कामे या जिल्ह्यात बाकी आहेत, याची आपल्याला पूर्णपणे माहिती असल्याचे देखील पालकमंत्री वर्षा गायकवाड यांनी सांगितले. निश्चितच जिल्ह्यातील विकासाची कामे पूर्णत्वास नेण्याचा प्रयत्न देखील करणार असल्याचे त्या यावेळी म्हणाल्या.
हेही वाचा - पालकमंत्र्यांच्या दौऱ्यात प्लास्टिक मोहिमेचा फज्जा
