मुंबई - बॉलिवूड अभिनेत्री नोरा फतेही आज 6 फेब्रुवारी तिचा 33वा वाढदिवस साजरा करत आहे. तिच्या वाढदिवशी, तिला बॉलिवूड स्टार्स आणि चाहत्यांकडून शुभेच्छा दिल्या जात आहेत. बॉलिवूडची डान्सिंग क्वीन म्हणून ओळखली जाणारी नोरा फतेही मूळची कॅनडाची आहे. चित्रपटांची आवड आणि ग्लॅमरच्या जगात नाव कमावण्याची इच्छा असल्यामुळं नोरा मुंबईत आली. मुंबईत आल्यानंतर तिनं खूप मेहनत केली. तिनं जबरदस्त डान्स करून प्रेक्षकांना वेड लावलं. नोरा सोशल मीडियावर खूप सक्रिय आहे. तिचा चाहतावर्ग खूप मोठा आहे. तिला इन्स्टाग्रामवर 47 दशलक्षाहून अधिक लोक फॉलो करतात.
नोरा फतेहीची बॉलिवूडमध्ये एंड्री : नोरा फतेहीनं आतापर्यंत 45हून अधिक प्रोजेक्ट्ससाठी काम केलं आहे. यातील अनेक चित्रपटांमध्ये नोरानं आयटम नंबर केले आहेत. नोरा चित्रपटांबरोबर म्युझिक व्हिडिओमध्येही काम करते. नोरानं 2014 मध्ये 'फगली' या चित्रपटातून तिच्या करिअरची सुरुवात केली. हा चित्रपट बॉक्स ऑफिसवर काही विशेष कामगिरी करू शकला नाही. यानंतर नोरानं बॉलिवूडमध्ये नाव कमवण्यासाठी खूप संघर्ष केला. यानंतर तिनं 2014मध्ये 'रोर: टाइगर ऑफ सुंदरबन' या चित्रपटातही काम केलं. तिचा सलग दुसरा चित्रपट देखील बॉक्स ऑफिसवर वाईटरित्या फ्लॉप झाला. यानंतर नोरा 'टेंपर' आणि 'मिस्टर एक्स' सारख्या चित्रपटांमध्ये दिसली.
'बाहुबली' चित्रपटानं नशीब चमकवलं : नोरा फतेहीला 'बाहुबली' चित्रपटातून बॉलिवूडमध्ये खरी ओळख मिळाली. तिनं 'बाहुबली' चित्रपटात एक दमदार आयटम साँग केलं आहे. या चित्रपटानंतर, नोराला बॉलिवूड चित्रपटातून ऑफर्स येऊ लागले. बॉलिवूड निर्मात्यांनी तिला काम देण्यास सुरुवात केली. 'बाहुबली'नंतर नोरा फतेहीला सलमान खानचा सुपरहिट चित्रपट 'किक 2' मिळाला. या चित्रपटात नोराची भूमिका खूपच छोटी होती, तरी तिनं लोकांच्या मनात स्थान निर्माण केलं. नोरानं अनेक चित्रपटांमध्ये उत्कृष्ट डान्स करून प्रेक्षकांची मनं जिंकली आहेत. यासोबतच नोराला बिग बॉस सारख्या रिअ‍ॅलिटी शोमधून देखील खूप प्रसिद्धी मिळाली. दरम्यान अलीकडेच नोराचे अमेरिकन गायक जेसन डेरुलोबरोबरचे नवीन गाणे 'स्नेक' रिलीज झाले आहे. हे गाणं अवघ्या 24 तासांत सर्वाधिक पाहिले जाणारे दुसरे गाणे बनले आहे.
हेही वाचा :
