गोंदिया - जिल्ह्यात एका तरुणीवर झालेला अ‍ॅसिड हल्ला असेल किंवा हैदराबाद येथील डॉक्टर तरुणीवर झालेले अत्याचार, अशा प्रकारच्या घटनांमुळे संपूर्ण देश हादरला होता. त्यानंतर पुन्हा एकदा महिला सुरक्षेचा प्रश्न ऐरणीवर आला आहे. त्यातून काहींची विकृत मानसिकता आणि दुय्यम वागणुकीमुळे महिलांच्या सुरक्षेचा प्रश्न निर्माण झाला आहे. या समस्येच्या सोडवणुकीसाठीच पोलिसांनी निर्भया पथके स्थापन केली. मात्र, आता शाळकरी मुलींना निर्भया पथकाची गरज भासणार नाही. कारण जिल्ह्यातील मुलींनी आता आत्मसंरक्षणाचे धडे घेतले आहेत.
मुलींना आत्मसुरक्षा धडे शिवण्यासाठी गेम्स स्पोर्ट अ‍ॅण्ड करीअर डेव्हलपमेंट फांउडेशनच्या वतीने गोंदियात निर्भया बेटी सुरक्षा अभियान राबविण्यात येत आहे. या माध्यमातून गोंदिया शहरातील तब्बल 25 शाळेतील हजारच्या वर शालेय विद्यार्थींनींना या फॉऊंडेशनच्या वतीने आत्मसंरक्षणाचे धडे देण्यात आले आहेत. या 10 दिवसीय आत्मसुरक्षा शिबिरामुळे रोडरोमिओ आणि छेडछाड करणाऱ्यांवर आता चांगलीच जरब बसणार आहे.
जिल्हा पोलीस दलाने महिला, मुली आणि महाविद्यालयीन तरुणींची छेडछाड रोखण्यासाठी निर्भया पथके सज्ज केली होती. पथकांना अत्याधुनिक साधन-सामुग्रीही दिली होती. परंतु आताचे जिल्हा पोलीस अधिक्षक मंगेश शिंदे यांनी ते पथक बंद केले आहे. त्यामुळे आता शहरात महिला, युवती आणि शाळकरी मुलींच्या मदतीला धावून येणारे कोणतेही पथक कार्यरत नाही. त्याच दृष्टीने शाळकरी मुलींना स्वत:ची आत्मसुरक्षा करता यावी म्हणून 10 दिवसीय आत्मसुरक्षा शिबिराचे आयोजन करण्यात आले होते.
या शिबिराच्या माध्यमातून महाविद्यालये, प्रमुख शाळा, गदीर्ची ठिकाणे, प्रमुख चौकात तरुण, तरुणींचे प्रबोधन करून १२ वर्षांवरील मुला-मुलींना कायद्याचे धडे देण्यात आले. मुलींना नाहक त्रास देणारे, छेडछाड करणाऱ्या व्यक्तीला कशा प्रकारे सामोरे जायचे आणि धडा शिकवायचा याचे प्रशिक्षण देण्यात आले आहे.
