गडचिरोली - भामरागड तालुक्यातील कोठी पोलीस मदत केंद्राच्या हद्दीत येणाऱ्या कोपर्शी जंगल परिसरात आज सकाळच्या सुमारास सी -60 कमांडोचे विशेष अभियान सुरु असताना जवानांची नक्षवाद्यांसोबत चकमक झाली. या चकमकीत कोणतीही जीवितहानी झालेली नाही. मात्र मोठ्या प्रमाणात नक्षवाद्यांचे साहित्य जप्त करण्यात आल्याची माहिती आहे.
सी- ६० पथकाचे जवान कोपर्शी जंगल परिसरात नक्षलविरोधी शोधमोहिम राबवित होते. याच वेळी दबा धरून बसलेल्या नक्षवाद्यांसोबत चकमक झाली. ही चकमक सुमारे अर्धा तास चालल्यानंतर पोलिसांचा वाढता दबाव पाहून नक्षवाद्यांनी जंगलात पळ काढला. घटनास्थळावर जवानांनी शोधमोहिम राबविली असता मोठ्या प्रमाणात नक्षली साहित्य आढळून आल्याचे सूत्रांनी सांगितले. 19 मे रोजी नक्षल्यांनी जिल्हा बंदचे आवाहन केले होते. या बंद दरम्यान अनेक ठिकाणी बॅनर, नक्षली पत्रके आढळून आली होती. त्यामुळे पोलीस दलातर्फे जंगल भागात शोधमोहीम राबविली जात आहे.
