धुळे - जिल्ह्यातील शिरपूर तालुक्यातील वाघोडी गावाजवळ झालेल्या कंपनीतील भीषण स्फोटाने संपूर्ण महाराष्ट्र हादरला आहे. हा स्फोट इतका भीषण होता की या स्फोटाचे 7 किलोमीटर पर्यंत हादरे बसले. या घटनेने अनेक प्रश्न उपस्थित केले आहेत.
शिरपूर तालुक्यातील वाघोडी गावाजवळ असलेल्या एका केमिकल कंपनीत शनिवारी सकाळी बॉयलरचा स्फोट झाला. ज्या कंपनीत हा स्फोट झाला ती कंपनी काय काम करते हे स्थानिकांना देखील माहीत नसल्याचे समोर आले आहे. ही कंपनी कुणाच्या मालकीची आहे याबाबत देखील कोणालाही माहिती नाही. विशेष म्हणजे घटना घडल्यानंतर अनेक तास उलटूनदेखील या कंपनीच्या मालकाचे नाव समोर आलेले नाही. तसेच याठिकाणी काम करणारे अनेक जण हे परराज्यातून आले असल्याचे सांगण्यात येत आहे.
याठिकाणी काम करणाऱ्या कामगारांच्या जीवाची कोणतीही काळजी घेण्यात आलेली नव्हती. या कंपनीचे फायर ऑडिटदेखील करण्यात आलेल नव्हते. मुळात, अशा कंपन्यांना परवानगी कशी मिळते, हा देखील प्रश्न आहे. ही कंपनी मुंबईच्या उद्योजकाची असल्याचे बोलले जात आहे. दरम्यान, या घटनेनंतर प्रशासन काय कारवाई करते हे बघणे महत्वाचे ठरणार आहे.
