धुळे - संपूर्ण राज्यात कोरोनाबाधित रुग्णांच्या संख्येत दिवसेंदिवस वाढ होत असताना राज्य शासनाच्या वतीने वीकेंड लॉकडाऊन जाहीर करण्यात आला आहे. या पार्श्वभूमीवर सर्वसामान्य नागरिकांनी प्रशासनाला सहकार्य करण्याचे आवाहन करण्यात आले होते. मात्र धुळे शहरात सर्वसामान्य नागरिकांकडून या नियमांचे सर्रास उल्लंघन होत असल्याचे चित्र पाहायला मिळाले.
धुळे शहरातील मुख्य बाजारपेठ असलेल्या आग्रा रोड भागातील तसेच अन्य विविध भागातील व्यावसायिकांनी आपली दुकाने पूर्णपणे बंद ठेवली होती. मात्र शहराच्या विविध भागात सर्वसामान्य नागरिकांची तुरळक गर्दी दिसून आली तसेच काही लहान व्यवसायिकांनी आपली दुकाने देखील सुरू ठेवली होती, यामुळे शहरासह जिल्ह्यात कोरोनाबाधित रुग्णांच्या संख्येत दिवसेंदिवस होणारी वाढ रोखणार तरी कशी, असा प्रश्न यानिमित्ताने उपस्थित केला जात आहे.
पोलीस अधीक्षकांकडून नागरिकांना आवाहन
शहराच्या मुख्य बाजारपेठ असलेल्या आग्रा रोड भागात पोलीस अधीक्षक चिन्मय पंडित यांनी भेट देऊन पाहणी केली तसेच विनाकारण रस्त्यावर फिरणाऱ्या नागरिकांवर कठोर कारवाई करण्याच्या सूचना त्यांनी पोलीस अधिकाऱ्यांना दिल्या.
नागरिकांनी प्रशासनाला सहकार्य करण्याचे पोलीस अधीक्षक यांचे आवाहन -
शहरासह जिल्ह्यात कोरोना बाधित रुग्णांच्या संख्येत होणारी वाढ रोखण्यासाठी नागरिकांनी प्रशासनाला सहकार्य करावे, तसेच विनाकारण रस्त्यावर फिरू नये. विनाकारण करणाऱ्या नागरिकांवर पोलीस प्रशासन कठोर कारवाई करणार असल्याची माहिती पोलिस अधीक्षक चिन्मय पंडित यांनी यावेळी दिली.
