चंद्रपूर - मागील ५ दिवसापासून जिल्ह्यात पडणाऱ्या संततधार पावसामुळे इरई धरणातील पाण्याची पातळी वाढली आहे. त्यामुळे इरई धरणाचे सर्व म्हणजेच सातही दरवाजे उघडण्यात आले आहे. तरी नदीशेजारील गावांना सतर्कतेचा इशारा देण्यात आला आहे. जिल्हा आपत्ती निवारण कक्षाच्या शोध व बचाव पथकाच्या माध्यमातून बचाव मोहिम राबविण्यात येत आहे. तसेच पूरपरिस्थिती निर्माण झाल्यास जिल्हा आपत्ती निवारण कक्षाला संपर्क करण्याचे आवाहन करण्यात आले आहे.
इरई हे धरण ९७ टक्के भरले असून हा दाब कमी करण्यासाठी धरणाचे सातही दरवाजे उघडण्यात आले आहे. त्यामुळे इरई नदीच्या जलपात्रात वाढ झाली आहे. तर शेजारील चिंचोळी, पाली, किटाळी, भटाळी, मीनगाव खैरगाव, विचोडा, अंभोरा, पडोली, कोसारा, वडगाव, दाताळा, चंद्रपूर, आरवट, माना तसेच इरई नदीच्या काठावर राहणाऱ्या सर्व लोकांना सतर्कतेचा इशारा देण्यात आला आहे. तसेच गावकऱ्यांनी स्वतः आपली गुरे व इतर मालमत्ता नदीच्या पात्रापासून दूर ठेवण्याचे आवाहन करण्यात आले आहे.
३ ऑगस्टला जिल्ह्यात सरासरी ७७.२१ मिमी पावसाची नोंद झाली आहे. यामध्ये चंद्रपूर ५२.६ मिमी, बल्लारपूर ८०, गोंडपिपरी ३१.२, पोंभूर्णा ४७, मूल ९५.४, सावली ९१.२, वरोरा ८१.८, भद्रावती ६२.३, चिमूर १४०.६, ब्रह्मपुरी ९२.१, सिंदेवाही १७०.३, नागभीड ९४.२, राजुरा ३७.७, कोरपना ४४.५, जिवती ३७.३ मिमी एवढया पावसाची नोंद झाली आहे. जिल्ह्यातील चारगाव, चदई, लभानसराड, आसोलामेंढा, नलेश्वर अशी ५ धरणे १०० टक्के भरलेली असून डोंगरगाव ८३ टक्के, घोडाझरी ५६ टक्के, अमलनाला ४७ टक्के भरलेले आहे.
पूरपरिस्थिती निर्माण झालेल्या खैरगाव, अंभोरा या ठिकाणी जिल्हा आपत्ती निवारण कक्षाच्या शोध व बचाव पथकाने ५ व्यक्ती तसेच काही जनावरांचे प्राण वाचवले आहेत, अशी माहिती जिल्हा आपत्ती निवारण अधिकारी जितेश सुरवाडे यांनी दिली. कुठलीही पूरपरिस्थिती निर्माण झाल्यास तत्काळ आपत्ती निवारण कक्षाला सूचना द्यावी, असे आवाहन जिल्हा प्रशासनाच्यावतीने करण्यात आले आहे.
