चंद्रपूर - इतर मागासवर्गीय वर्गाची (ओबीसी) स्वतंत्र जनगणना होत नसल्याने समाजाला योग्य ते लाभ मिळू शकत नाहीत. 2021 मध्ये राष्ट्रीय जनगणना होणार आहे. म्हणून यात यामध्ये ओबीसींसाठी स्वंतत्र कॉलम असावा, अशी मागणी खासदार बाळु धानोरकर यांनी केली आहे. धानोरकर यांनी मंगळवारी पंतप्रधान नरेंद्र मोदी यांची भेट घेतली. यावेळी त्यांनी चंद्रपूर मतदारसंघातील अनेक प्रश्नांसंदर्भात चर्चा केली. तसेच त्यासंबधीचे निवेदन पंतप्रधान मोदी यांना दिले. काँग्रेसचे खासदार धानोरकर हे चंद्रपूर-वणी-आर्णी लोकसभा मतदारसंघाचे प्रतिनिधित्व करतात.
पूर्व पंतप्रधान पी. व्ही. नरसिंह राव यांनी भद्रावती तालुक्यात ३००० एकर जमीन ऊर्जाप्रकल्पासाठी मंजूर केली. मात्र, अजुनही तिथे कोणताही उद्योग सुरू होऊ शकला नाही. याठिकाणी एखाद्या उद्योगास मान्यता मिळावी. तसेच कोळसा खाणीत जमिनी गेलेल्या शेतकऱ्यांना त्याचा योग्य मोबदला देऊन त्यांच्या कुटुंबातील सदस्यांना नोकऱ्या देण्यात याव्या. शहरात एका मल्टिस्पेशालिटी रुग्णालयाला परवानगी देण्यात यावी. जिल्ह्यात रखडलेल्या सिंचन प्रकल्पांना निधी उपलब्ध करुन देण्यात यावा. मुंबई ते चंद्रपूर आणि पुणे थेट रेल्वे सुरू करण्यात यावी, अशा मागण्या त्यांनी आपल्या निवेदनात केल्या आहेत.
याचबरोबर चंद्रपूर औद्योगिक शहर आहे. मात्र, येथील प्रस्तावित विमानतळ राजुरा येथे आहे. राजुरा शहर दुसऱ्या टोकाला असल्याने हे विमानतळ भद्रावती येथे बनवण्यात यावे. चंद्रपूरच्या दिक्षाभूमीला ऐतिहासिक वारसा आहे. अनेक बौद्ध बांधवांची आस्था या ठिकाणी जुळलेली आहे. यामुळे दिक्षाभूमीचा विकास करण्यासाठी योग्य निधी उपलब्ध करुन द्यावा. कर्नाटक एम्टा ही खाण पुन्हा सुरू करण्यात यावी. यासोबतच जिल्ह्यात ताडोबा राष्ट्रीय उद्यान, गोंडकालीन किल्ले आहेत. जागतिक पर्यटनाच्या दृष्टीने या सर्वांचा विकास करण्यासाठी आवश्यक निधी द्यावा, अशी मागण्या धानोरकर यांनी या भेटी दरम्यान केल्या आहेत.
हेही वाचा - 'शिवसेना शिवजयंती तिथीप्रमाणेच साजरी करणार'
