चंद्रपूर - नोकर भरती प्रकरणात जिल्हा मध्यवर्ती बँकेचे अध्यक्ष मनोहर पाऊणकर यांना अटक झाल्यानंतर आता संचालक मंडळांनी २४ कर्मचाऱ्यांना बडतर्फ केले आहे. या कर्मचाऱ्यांचे वैद्यकीय प्रमाणपत्र बोगस असल्याचा कारणावरून ही कारवाई करण्यात आली. मात्र, दुसरीकडे वैद्यकीय मंडळासमोर येत्या २५ ऑगस्टला या कर्मचाऱ्यांची फेर वैद्यकीय तपासणी होणार आहे. तत्पूर्वीच कर्मचाऱ्यांच्या बडतर्फीचा निर्णय संचालक मंडळाने घेतल्याने अनेकांच्या भुवया उंचावल्या आहेत. दरम्यान या निर्णयाच्या विरोधात हे कर्मचारी न्यायालयात जाण्याच्या तयारी आहेत.
जिल्हा मध्यवर्ती बँकेचे अध्यक्ष मनोहर पाऊणकर यांनी आपल्या कार्यकाळात वैद्यकीय कारणावरून स्वेच्छा निवृत्ती घेतलेल्या कर्मचाऱ्यांच्या पाल्यांना नोकरीत सामावून घेतले. मात्र, या कर्मचाऱ्यांनी बोगस वैद्यकीय प्रमाणपत्र देऊन पाल्यांसाठी नोकरी मिळविली, असा आरोप काही संचालकांनी केली. याची तक्रार पोलिसांत केली. या तक्रारीवरून मनोहर पाऊणकर आणि बँकेचे मुख्य कार्यकारी सिद्धार्थ दुबे यांना अटक झाली. सध्या हे दोघेही न्यायालयीन कोठडीत आहे.
खरेदी प्रकरणात पाऊणकर यांच्यावर आणखी एक गुन्हा दाखला आहे. आर्थिक गुन्हे शाखेने त्यांना ताब्यात घेतले आहे. दरम्यानच्या काळात संचालक मंडळाने ठराव घेऊन पाऊणकर यांचे अधिकारी गोठविले आहे. दुसरीकडे न्यायालयाच्या आदेशाने येत्या २५ ऑगस्टला वैद्यकीय मंडळासमोर निवृत्ती स्वीकारलेल्या २२ कर्मचाऱ्यांची फेर वैद्यकीय तपासणी होणार आहे. यासंदर्भात आर्थिक गुन्हे शाखेने सबंधितांना पत्र पाठविले आहे. मात्र,फेर वैद्यकीय तपासणी होण्यापूर्वी संचालक मंडळाने २२ कर्मचाऱ्यांना बडतर्फ केले. सेवा समाप्तीचे पत्रही त्यांना पाठविण्यात आले.
ज्या कारणासाठी पाऊणकर यांना अटक झाली. त्याची तपासणी होण्यापूर्वी बडतर्फीची कारवाई केल्याने अनेकांच्या भुवया उंचावल्या आहे. दरम्यान, बडतर्फ कर्मचाऱ्यांनी आता न्यायालयात दाद मागण्याची तयारी चालविली आहे. फेर वैद्यकीय तपासणी झाल्यानंतर पुढे काय ते ठरवू, असे आर्थिक गुन्हे शाखेचे पोलीस निरीक्षक प्रमोद मकेश्वर यांनी सांगितले. वैद्यकीय प्रमाणपत्र योग्य असेल तर पुन्हा नोकरीत सामावून घेवू, असे संचालक मंडळाचे म्हणणे आहे.
