बुलडाणा - ग्रामीण भागातील विद्यार्थ्यांना एसटी महामंडळाच्या अनियमित बसफेऱ्यांमुळे त्रास सहन करावा लागतो. शाळा, महाविद्यालयासाठी पासेस दिले जातात. मात्र, बसेस कधीच वेळेवर येत नाहीत. दैनंदिन वेळापत्रक पाळले जात नसल्याने विद्यार्थ्यांना चक्क एसटीच्या टपावर बसून प्रवास करावा लागत असल्याचे चित्र बुलढाणा जिल्ह्यातील खामगाव तालुक्यात दिसून आले. विद्यार्थी एसटीच्या टपावर बसून प्रवास करत असल्याचा एक व्हिडीओ सध्या सोशल मीडियावर व्हायरल झाला आहे.
याबाबत अधिक माहिती अशी की, सोमवारी कवळगाववरून खामगावकडे निघालेल्या बस (एम-40-एन-9666) च्या टपावर बसून दिवठाणा येथील शाळेचे विद्यार्थी जात असल्याचा व्हिडीओ व्हायरल झाला आहे. बसमध्ये जागा नसल्यामुळे हे विद्यार्थी बसच्या टपावर बसून प्रवास करत होते. सुमारे 35 कि.मी च्या धोकादायक प्रवासात सुदैवाने कोणत्याही विद्यार्थ्याला इजा पोहचली नाही.
शाळा, महाविद्यालयात येण्यासाठी बस वेळेवर न आल्याने विद्यार्थ्यांना असा हा जीवघेणा प्रवास करावा लागत आहे. शाळा सुटल्यानंतरही विद्यार्थी कित्येक तास बसस्थानकावरच असतात. मात्र, बसही कधीच वेळेवर येत नाही. त्यामुळे विद्यार्थ्यांनी सोमवारी टपावर बसून प्रवास केला. या प्रकरणी चालकाची चौकशी करण्याचे आदेश खामगाव येथील आगार व्यवस्थापक रितेश पुलपगारे यांनी दिले आहेत.
