भंडारा- पावसाळा सुरू होण्याअगोदर नालेसफाई होणे अपेक्षित असते. मात्र, भंडारा नगरपालिकेने जून महिन्यात नालेसफाईची कामे हाती घेतले आहे. अशा वेळेस पाऊस लवकर आला असता तर महापालिकेचा पावसाच्या नियोजन संदर्भातील ढिसाळपणा पुढे आला असता. मात्र, पावसाने दांडी मारल्याने पालिकेचे पितळ उघडे पडले नाही.
मे महिन्याच्या शेवटपर्यंत शहरातील मोठे नाल्यांची सफाई होणे अपेक्षित असते. मात्र, यावर्षी आचारसंहिता असल्यामुळे निविदा काढून खाजगी लोकांना नालेसफाईचे काम देण्यास उशीर झाला. त्यामुळे भंडारा शहरातील मोठे नालेसफाईचे कार्य जून महिन्यात सुरू करण्यात आले. २५ जूनपर्यंत शहरातील फक्त ५० टक्केच मोठे नाले साफ झाले असून उर्वरित नालेसफाईचे काम युद्धपातळीवर सुरू असल्याचे विश्वास भंडारा नगरपालिकेचे मुख्यधिकारी यांनी दाखविला आहे.
दरवर्षी १ जून ते १० जूनच्या दरम्यान वरून राजा हजेरी लावतो. मात्र, यावर्षी २५ जून पर्यंत भंडारा शहरात पाऊसच पडला नसल्याने शेतकरी व सर्वसामान्य नागरिकांचे पाण्यासाठी धावपळ सुरू आहे. मात्र, पाऊस न येण्याचा फायदा भंडारा नगरपालिकेला होत आहे. जर या २५ दिवसात पावसाने जोरदार हजेरी लावली असती तर सफाई न झालेल्या मोठ्या नाल्यांचे सांडपाणी लोकांच्या घरात शिरले असते. मात्र, सुदैवाने अजून पर्यंत पाऊस बरसला नाही, त्यामुळे भंडारा नगरपालिकेचा गलथान कारभार समोर आलेला नाही.
दरवर्षी पावसामध्ये भंडारा शहरात बऱ्याच भागात पाणी साचते. हे पाणी लोकांच्या घरातही जाते. त्यामुळे, नागरिकांचे मोठे नुकसान आणि हाल होतात. मात्र, एवढे असूनही प्रशासन नालेसफाईच्या कामात अजिबात गंभीर नसल्याचे दिसून येत आहे. सध्या भंडारा नगरपालिकेचे ढिसाळ नियोजन बऱ्याच ठिकाणी पाहायला मिळत आहे. त्यातच नगराध्यक्ष हे खासदार झाल्यापासून दोन्ही जबाबदाऱ्या सांभाळत असल्याने नगरपालिकेकडे पूर्णपणे दुर्लक्ष झाले आहे. त्यामुळे बरेचदा निर्णय घेताना अडचण निर्माण होत आहे.
शहरातील लहान नाल्यांना नगरपालिकेच्या सफाई कामगारांच्या माध्यमातून साफ केले जाते. मात्र, मोठे नालेसफाई करण्यासाठी खाजगी कर्मचारी लावून सफाई केली जाते. कंत्राटदारही ६० पैकी केवळ ३० लोकांनाच सफाईसाठी पाठवत असल्याने कामाला पाहिजे तशी गती मिळत नसल्याचे चित्र दिसत आहे. आचारसंहिता असल्याने कामे उशिरा सुरू झाली असली तरी येणाऱ्या काही दिवसात शंभर टक्के नालेसफाई होईल असे भंडारा नगरपालिकेचे मुख्याधिकारी यांनी सांगितले आहे.
