प्रदीर्घ कालावधीनंतर जिल्ह्यात पावसाची सर्वदूर हजेरी

प्रदीर्घ कालावधीनंतर भंडारा जिल्ह्यात पावसाने सर्वदूर हजेरी लावली आहे. पावसामुळे शेतकऱ्यांच्या पिकांना नवीन जीवनदान मिळाले आहे. नागरिकांनाही असह्य उकाड्यापासून दिलासा मिळाला आहे.

भंडारा - 20 ते 25 दिवसांच्या कालावधीनंतर भंडारा जिल्ह्यात पावसाने सर्वदूर हजेरी लावली आहे. या पावसामुळे शेतकऱ्यांच्या पिकांना नवीन जीवनदान मिळेल. नागरिकांनाही असह्य उकाड्यापासून दिलासा मिळाला आहे. मात्र हा पाऊस दररोज यावा, अशी अपेक्षा नागरिक करत आहेत.

जून महिन्यात भंडारा जिल्ह्यात पावसाने हजेरी लावली होती. चार-पाच दिवस सलग पाऊस आल्याने शेतकऱ्यांनी धानाची लागवड केली, मात्र त्यानंतर पावसाने दडी मारली होती. मागील 20 दिवसांपासून पिकांना पाऊस न मिळाल्याने पिके करपायला लागली होती. त्यामुळे शेतकरी मोठ्या आतुरतेने पावसाची वाट पाहत होता. तसेच नागरिकांनाही उकड्याचा त्रास सहन करावा लागत होता. सुरुवातीला तुमसर तालुक्यामध्ये आणि एक तासाच्या कालावधीनंतर संपूर्ण जिल्ह्यात पावसाने हजेरी लावली. दररोज पावसाने दमदार हजेरी लावली तरच शेतातील परे जगतील आणि त्यांची रोवणी ही शक्य होईल. जिल्ह्यात आत्तापर्यंत सरासरीच्या केवळ ४९ टक्केच पाऊस पडला आहे.