तज्ञांनी आवाहन करून देखील आरोग्य कर्मचाऱ्यांचा कोरोना लसीकरणाला अल्प प्रतिसाद

बीड जिल्ह्यात दिवसाला 500 आरोग्य कर्मचाऱ्यांना कोरोना लस टोचण्याचे उद्दिष्ट आहे. मात्र आरोग्य विभागातील कर्मचाऱ्यांचा लस टोचून घेण्यासाठी प्रतिसाद मिळत नसल्याचे वास्तव समोर येत आहे.

बीड - कोरोनाच्या बिकट परिस्थितीमध्ये फ्रन्टलाइनवर काम करणाऱ्या आरोग्य कर्मचाऱ्यांना कोरोनाची लस टोचण्याची मोहीम चार दिवसांपूर्वी राज्यभरात सुरू झाली. यामध्ये बीड जिल्ह्यात 17 हजाराहून अधिक आरोग्य कर्मचारी आहेत. बीड जिल्ह्यात दिवसाला 500 आरोग्य कर्मचाऱ्यांना लस टोचण्याचे उद्दिष्ट आहे. मात्र आरोग्य विभागातील कर्मचाऱ्यांचा, लस टोचून घेण्यासाठी प्रतिसाद मिळत नसल्याचे वास्तव समोर येत आहे. याबाबत पुढे येऊन बोलण्यास आरोग्य कर्मचारी तयार नाहीत. मात्र खाजगीत बोलताना अनेक आरोग्य कर्मचाऱ्यांनी सांगितले की, काही राज्यांमध्ये अनुचित घटना घडलेल्या आहेत. त्यामुळे आम्हाला लस टोचून घेण्यासाठी भीती वाटत आहे. असे कारण पुढे केले जात आहे.

कोरोनाची लस अगदी सुरक्षित असल्याचे डॉक्टरांनी यापूर्वी देखील सांगितलेले आहे. लस कुठलीही असो टोचल्यानंतर थोडासा त्रास होणारच त्यामुळे आरोग्य कर्मचारी असो की, सर्वसामान्य नागरिक यांनी घाबरून न जाता कोरोनाची लस टोचून घ्यावी, असे आवाहन तज्ञांनी केलेले आहे.

आरोग्य विभागातील वरिष्ठ अधिकारी अद्यापही लसीकरणापासून वंचित-

बीड जिल्ह्यातील आरोग्य विभागातील वरिष्ठ अधिकारी यांनी अद्याप पर्यंत कोरोनाची लस टोचून घेतलेली नाही. याचा परिणाम कर्मचारी पुढे येऊन कोरोनाची लस टोचून घेत नाहीत. असे देखील दिसून आले. आतापर्यंत दोनशेपेक्षा अधिक कर्मचाऱ्यांना कोरोनाची लस टोचण्यात आली आहे. यापैकी पंचवीस ते तीस जणांना सौम्य लक्षणे जाणवली. यामध्ये अंगावर खाज येणे, डोके दुखणे, ताप येणे आदी प्रकार जाणवले.येणाऱ्या काळात बीड जिल्ह्यातील 17 हजाराहून अधिक आरोग्य कर्मचाऱ्यांना कोरोनाची लस टोचण्याचे मोठे आव्हान बीड जिल्हा प्रशासनासमोर आहे. या सगळ्या परिस्थितीत लसीकरण मोहिमेमध्ये काम करणारे डॉक्टर व आरोग्य कर्मचारी अत्यंत प्रामाणिकपणे व मेहनतीने लसीकरणाची मोहीम राबवत आहेत, असे दिसते.

हेही वाचा - गेवराईत भाजपचे आंदोलन; अवैध वाळू वाहतूक बंद करण्याची मागणी

हेही वाचा - अबब... सात एकरात शंभर टन कांद्याचे उत्पादन!