बीड - मागील 20 वर्षांपासून सातत्याने मी जनतेच्या सुख-दुःखात सहभागी असतो. आतापर्यंत बीडच्या क्षीरसागर काका-पुतण्याने जनतेची फसवणूक केली आहे. बीडची जनता आता काका-पुतण्याच्या या नौटंकीला वैतागली आहे, असा टोला एमआयएमचे उमेदवार ॲड. शेख शफीक यांनी लगावला आहे. ते पत्रकार परिषदेत बोलत होते.
हेही वाचा - सामाजिक परिवर्तनासाठी साथ द्या, जयदत्त क्षीरसागरांचे मतदारांना आवाहन
बीड विधानसभा मतदारसंघातून पूर्वी राष्ट्रवादी काँग्रेसमध्ये सक्रिय असलेले ॲड. शेख शफीक यांना एमआयएम पक्षाने बीड विधानसभा मतदारसंघातून उमेदवारी जाहीर केली आहे. अर्ज दाखल केल्यानंतर शेख शफीक यांनी पत्रकारांशी संवाद साधला. यावेळी बोलताना ते म्हणाले की, बीड नगरपालिकेच्या विकासासंदर्भात बीडची जनता जाणून आहे. ज्यांनी केवळ जनतेच्या डोळ्यात धूळफेक केली, अशा क्षीरसागर काका -पुतण्यांना बीडची जनता धडा शिकवल्याशिवाय राहणार नाही.
हेही वाचा - ही जनशक्ती विरुद्ध धनशक्तीची लढाई; संदीप क्षीरसागरांनी काकांवर डागली तोफ
एमआयएम पक्षाने मला बीड विधानसभा मतदारसंघातून उमेदवारी दिली आहे. जनतेने बीडच्या या क्षीरसागर काका-पुतण्याला धडा शिकवावा व पाठीशी राहावे, असे आवाहन यावेळी शफिक यांनी केले. बीड विधानसभा मतदारसंघात शिवसेनेकडून जयदत्त क्षीरसागर, राष्ट्रवादीचे संदीप क्षीरसागर व वंचित आघाडीकडून अशोक हिंगे निवडणुकीच्या रिंगणात असतील 7 ऑक्टोबरला अर्ज मागे घेण्याची शेवटची तारीख असल्याने त्यानंतरच बीड विधानसभा मतदारसंघातील लढतीचे चित्र स्पष्ट होणार आहे.
