औरंगाबाद - अवकाळी पावसामुळे राज्यभरात पिकांचे मोठ्या प्रमाणात नुकसान झाले. यामध्ये मराठवाड्यातील 68 शेतकऱ्यांनी आत्महत्या केल्याचे धक्कादायक वास्तव समोर आले आहे. संबंधित आकडेवारी 14 ऑक्टोबर ते 11 नोव्हेंबर या काळातील असून, धीर खचलेल्या शेतकऱ्यांनी थेट जीवनयात्रा संपवण्याचा निर्णय घेतल्याचे चित्र आहे.
ऑक्टोबरमध्ये मराठवाड्यातील सर्वाधिक आत्महत्या बीड जिल्ह्यात झाल्या आहेत. बीडमध्ये 16, औरंगाबाद- 09, जालना 06, परभणी- 11, हिंगोली- 04, नांदेड - 12, तसेच लातूरमध्ये - 07 व उस्मानाबाद जिल्ह्यात 03 शेतकऱ्यांनी आत्महत्या केल्याची असल्याची माहिती समोर आली आहे.
या वर्षातील पहिल्या दहा महिन्यांत मराठवाड्यात 746 शेतकऱ्यांनी आत्महत्या केल्याची नोंद आहे. परतीच्या पावसाने 41 लाख हेक्टरवरील खरीप हंगामातील काढणीला आलेले पीक खराब झाले.
मका, सोयाबीन, कापूस आणि इतर पिकांचे यामुळे मोठ्या प्रमाणात नुकसान झाले. कधी दुष्काळ, कधी गारपीट, तर कधी परतीच्या पावसाने शेतकरी हवालदिल झाला आहे. शेतकरी आत्महत्या थांबवण्यासाठी सरकारी उपाययोजना कमी पडत असल्याचे या निमित्ताने पुन्हा स्पष्ट झाले आहे.
