नितीन गडकरींच्या अल्टिमेटमला कंत्राटदारानं दाखवली केराची टोपली, नागपूर विमानतळाचं काम अपूर्णच

"एक महिन्याच्या आत काम पूर्ण करा, अन्यथा कारवाई करण्यात येईल", असा अल्टिमेटम नितीन गडकरी यांनी नागपूर विमानतळातील धावपट्टीच्या रिकार्पेटिंगचं काम करणाऱ्या कंत्राटदार कंपनीला दिला होता.

नागपूर : डॉ. बाबासाहेब आंबेडकर आंतरराष्ट्रीय नागपूर विमानतळातील धावपट्टीच्या रिकार्पेटिंगचं काम महिनाभरात पूर्ण करण्याचा अल्टिमेटम केंद्रीय मंत्री नितीन गडकरी (Nitin Gadkari) यांनी दिला होता. मात्र, महिनाभराचा कालावधी पूर्ण होऊन देखील धावपट्टीच्या रिकार्पेटिंगचं काम आद्यपही अपूर्णच आहे. त्यामुळं आता याप्रकरणी नितीन गडकरी काय कारवाई करणार? हे पाहणं महत्त्वाचं ठरणार आहे.

60 टक्के काम पूर्ण : विमानतळाच्या धावपट्टीच्या रिकार्पेटिंगचं काम केवळ 60 टक्केचं पूर्ण झालय. तर संपूर्ण काम पूर्ण करण्यासाठी 31 मार्च पर्यंतची मुदत मिळावी, अशी मागणी रिकार्पेटिंगचं काम करत असलेल्या के जी इन्फ्रास्ट्रक्चर कंपनीनं केलीय. मुळात काम वेळेत पूर्ण होण्यासाठी दररोज सकाळी दहा ते संध्याकाळी सहा वाजेपर्यंत 'रन-वे' बंद ठेवण्याचं ठरवण्यात आलं होतं. मात्र, अनेक विमानांचं आकस्मिक उड्डाण आणि लॅडिंगसाठी गेल्या 2 महिन्यात वारंवार काम बंद करावं लागलं. तसंच व्हीव्हीआयपी मुव्हमेंटसाठी सकाळी दहा ते संध्याकाळी सहाच्या दरम्यान अनेकवेळा काम बंद करावं लागतं. त्यामुळं रिकार्पेटिंगचं काम वेळेत होऊ शकलं नसल्याचं सांगितलं जातय.

धावपट्टी ते हॉट मिक्स प्लांटचे अंतर अधिक : विमानतळातील धावपट्टीच्या रिकार्पेटिंगचं काम करण्यासाठी काँक्रीटची आवश्यकता आहे. मात्र, या कामासाठी आवश्यक हॉट मिक्स प्लांट हा धावपट्टीपासून लांब आहे. रिकार्पेटिंगसाठीचं साहित्य आणण्यासाठी देखील बराच वेळ जातो. त्यामुळं आता काम करणाऱ्या कंपनीला अतिरिक्त क्षमतेचा हॉट मिक्स प्लांट सुरू करण्याची परवानगी, देण्यात आली आहे.

नितीन गडकरींनी व्यक्त केली होती नाराजी : गेल्या वर्षी 23 डिसेंबरला केंद्रीय मंत्री नितीन गडकरी यांनी धावपट्टीची पाहणी केली होती. नवीन धावपट्टीच्या कामाला वेळ लागत असल्यानं गडकरी यांनी तीव्र नाराजी व्यक्त केली. "एक महिन्याच्या आत हे काम पूर्ण करा, अन्यथा कारवाई करण्यात येईल", असा अल्टिमेटम गडकरी यांनी संबंधित कंपनीला दिला होता. तसंच कामात उशीर झाल्यानं नागपूरकरांना नाहक त्रास सहन करावा लागला. त्यासाठी त्यांनी दिलगिरी देखील व्यक्त केली होती.

काम सुरू पण संथगतीनं : कंपनीला मे 2024 मध्ये कार्यादेश मिळाल्यावर जून ते सप्टेंबर 2024 या कालावधीत सर्वेक्षण करून अहवाल सादर करण्यात आला. त्यानंतर 1 ऑक्टोबर 2024 पासून प्रत्यक्ष कामाला सुरुवात झाली. मात्र, त्यानंतर काही कारणांनी काम बंद होतं. 24 नोव्हेंबरपासून पुन्हा कामाला सुरुवात झाली. पहिल्या लेअरचं काम 80 टक्के पूर्ण झालय. तर दुसऱ्या आणि तिसऱ्या लेअरचं काम पूर्ण होण्यासाठी 21 मे 2025 पर्यंतचा कालावधी लागेल, असं आता कंपनीकडून सांगण्यात आलय.

हेही वाचा -