अमरावती - तीव्र इच्छा असेल तर अशक्य अशी कोणतीच गोष्ट नाही. तंबाखूचे व्यसन असलेल्या अनेकांनां प्रयत्न करुनही तंबाखू सुटत नाही. मात्र, आपल्या इच्छाशक्तीच्या जोराबर अमरावतीतील एका व्यापाऱ्याने तंबाखू सोडली व ते सध्या व्यसनमुक्त झाले आहेत. जागतिक तंबाखू विरोधी दिनाचे औचित्य साधून त्यांनी आपला अनुभव 'इटीव्ही भारत'च्या माध्यमातून सांगितले.
...जगायचं असेल तर तंबाखू सोडा - दिवस-रात्र पान, तंबाखू, खर्रा खात होतो. पान टपरीवाला मी दिसताच माझे पान तयार करून ठेवत होता. घरेच सगळे तंबाखू खाण्यापासून रोखायचे मात्र, मी त्यांच्याकडे दुर्लक्ष करत होते. एक दिवस तोंडात फोड आला त्यानंतर मी डॉक्टरांकडे गेलो. त्यावेळी तुम्ही तंबाखू किंवा तंबाखूजन्य पदार्थ खाता का, असे डॉक्टरांनी विचारले. हो म्हणताच जगायचं असेल तर तंबाखू सोडा, असे डॉक्टरांनी मला ठणकावले. हे ऐकताच मी धास्तावलो. मी लगेचच खिशात असणारी खर्ऱ्याची पुडी रुग्णालयातील डस्टबीनमध्ये फेकली. त्यानंतर आज सहा वर्षे झाली मी तंबाखू खाल्लोच नाही. ज्यांना तंबाखू सोडायची आङे त्यांनी मनाची ठाम तयारी करावी. मनाची तयारी असल्यास तंबाखू सुटते, असा सल्लाही राजूभाई केडिया यांनी दिला.
'असे' आहेत तंबाखू सेवनाचे प्रकार - तंबाखूसह विडी, सिगारेटमधून तंबाखूचे सेवन केले जाते. पान मसाला, गुटख्यातून तंबाखू सेवन आणि हुक्काच्या माध्यमातून तंबाखूचे सेवन केले जाते. तंबाखूमध्ये पाच हजार रासायनिक द्रव्य आणि 100 हून अधिक हानीकारक घटक आहेत. यामध्ये निकोटीन, हायड्रोजन, सायनाइड, फार्मर्लाडाईड, लेड, आर्सेनिक अमोनिया आणि रेडिओॲक्टिव्ह एलिमेंट्स चा समावेश असतो.
तंबाखूजन्य पदार्थ सेवनाचे अपाय - तंबाखू शरीरास अतिशय अपायकारक आहे. तंबाखूमध्ये असणाऱ्या निकोटिनचे व्यसन आरोग्यासाठी अत्यंत वाईट आहे. हे घातक कर्करोग आणि मेंदू रोग होण्यास कारणीभूत आहेत. कर्करोग कधीही बरा होऊ शकत नाही, असे डॉ. नीरज मुरके म्हणाले. निकोटीनच्या अतिसेवनामुळे तोंडाचा, जिभेचा, गळ्याचा, फुप्फुसाचा कर्करोग होण्याची दाट शक्यता असते. तसेच हृदय विकार, स्ट्रोक, हृदयविकाराच तीव्र झटका, डोळ्यांचे आजार अशा आजारांना बळी पडत व्यक्तीचा मृत्यूही होऊ शकतो, असे डॉ. नीरज मुरके यांनी स्पष्ट केले.
अशी करावी तंबाखू पासून सुटका - तंबाखू व धूम्रपानाच्या व्यसनापासून स्वतःची सुटका करण्यासाठी सर्वात आधी आपला निर्धार पक्का असवा काही झाले तरी तंबाखू सिगारेटला हात लावू नये. स्वतःचा निर्धार पक्का असेल तरच तंबाखूपासून कायमची सुटका होऊ शकते, असे डॉ. मुरके यांनी स्पष्ट केले.
हेही वाचा - World No Tobacco Day 2022 : तंबाखूपासून मुक्त होण्यासाठी आता मॅजिक मिक्स
