अमरावती: महाराष्ट्राच्या विविध जिल्ह्यांत अवकाळी पावसाने जोरदार हजेरी लावली आहे. यामुळे शेतीपिकांचे मोठे नुकसान होत आहे. तसेच काही भागात मात्र दुर्दैवी घटनाही घडत आहेत. अमरावती जिल्ह्यात शुक्रवारी सर्व दूर वादळी पावसाने धुमाकूळ घातला. जिल्ह्यातील धामणगाव रेल्वे तालुक्यात येणाऱ्या मलातपुर या गावात वीज कोसळल्याने एक शेतकरी जागीच ठार झाला, तर दोघेजण जखमी झाले आहेत. गोपाल करपती ( 30) असे वीज पडून मृत्युमुखी पडलेल्या शेतकऱ्याचे नाव आहे. तर विनायक ठाकरे आणि जगदीश मंडळे अशी जखमींची नावे आहेत.
लिंबाच्या झाडाखाली उभे असताना कोसळली विज: धामणगाव रेल्वे तालुक्यातील मलातपुर येथील रहिवासी असणारे मृतक गोपाल करपती, जगदीश मंडळे आणि विनायक ठाकरे हे तिघेही लगतच्या जळकापटाचे या गावात एका शेतात हनुमान जयंती निमित्त आयोजित महाप्रसादासाठी गेले होते. महाप्रसाद घेतल्यावर दोन वाजेच्या सुमारास वादळी वाऱ्यासह पाऊस कोसळायला लागला. या तिघांनीही एका लिंबाच्या झाडाखाली आश्रय घेतला. यावेळी लिंबाच्या झाडावर वीज कोसळली आणि यात गोपाल करपती हे जागीच ठार झाले. तर दोन्ही जखमी व्यक्तींना धामणगाव ग्रामीण रुग्णालयात दाखल करण्यात आले आहे. सध्या त्यांची प्रकृती चिंताजनक आहे.
जिल्ह्यात सर्वदूर पाऊस: जिल्ह्यात शुक्रवारी दुपारी दोन वाजल्यापासून वादळी वाऱ्यासह पाऊस कोसळला. दुपारी आलेल्या वादळामुळे अनेक भागात झाड कोलमडली. वादळी वाऱ्यामुळे शहरातील अनेक भागात दुपारपासून रात्री आठ वाजेपर्यंत वीज पुरवठा खंडित होता. अमरावती शहरासह चांदूर रेल्वे, धामणगाव रेल्वे, दर्यापूर, तिवसा, वरुड मोर्शी अचलपूर या तालुक्यांना वादळी पावसाचा फटका बसला. मेळघाटात सायंकाळी सहा वाजता वादळी वाऱ्यासह पावसाला सुरुवात झाली. मेघाटातील चिखलदरा आणि धारणी या दोन्ही तालुक्यात रात्री आठ नंतर वादळ आणि विजांच्या कडकडाटातसह मुसळधार पाऊस बरसला. तर पुढील 24 तास अमरावती जिल्ह्यात ऑरेंज अलर्ट घोषित करण्यात आला आहे. हवामान विभागाने जिल्ह्याच्या अनेक भागात गारपीट होण्याची शक्यता देखील वर्तवली आहे.
