अमरावती - शहरा लगतच्या १६ किलोमीटरवरील १० हजार लोकसंख्या असलेल्या अंजनगाव बारी गावाला दरवर्षीप्रमाणे यंदाही पाणी टंचाईची झळ सोसावी लागत आहे. अशात या गावकऱ्यांच्या मदतीला गावापासून काही अंतरावर शेती करणारे रवींद्र मेटकर बंधू धावून आले आहेत. त्यांनी आपल्या शेतातल्या कुंपनलीकेतून पाणी मार्च महिन्यापासूनच गावाला देणे सुरू केले असून ग्रामस्थांची तहान भागविण्याचे काम ते करत आहेत.
अत्यल्प पावसामुळे अमरावती जिल्ह्यातल्या अनेक गावांमध्ये पाणी टंचाई जाणवत आहे. अमरावती जिल्ह्यातील अंजनगाव बारी हे गाव त्यातीलच एक आहे. गावाला पाणी पुरवठा करण्यासाठी कोंडेश्‍वर तलावाजवळ आणि मेघे इंजीनीअरींग कॉलेजजवळ ग्रामपंचायत प्रशासनाने तयार केलेल्या विंधन विहीर आटल्यामुळे नागरिकांना मार्च महिन्यापासूनच पाणी टंचाईचा सामना करावा लागत आहे. त्यावर मात करण्यासाठी ग्रामपंचायत पदाधिकार्‍यांनी गावापासून काही अंतरावर शेती करणार्‍या अमरावतीच्या रवींद्र आणि दिलीप मेटकर यांच्याशी संपर्क साधला.
त्यांच्या शेतातल्या कुंपनलीकेचे पाणी गावकर्‍यांची तहान भागविण्यासाठी देण्याची विनंती केली. ती मेटकर बंधूंनी मान्य केली. शेतातल्या केळीच्या झाडांना पाणी न देता गावाला पाणी देण्याचे औदार्य त्यांनी गेल्या दोन वर्षांपासून दाखवले. या दोन्ही वर्षी त्यांच्या पिकांचे नुकसान झाले. यंदा संपूर्ण गावाला पाणी देण्याचे हे तिसरे वर्ष आहे. महत्तवाचे म्हणजे वीजेचे बिलही मेटकरच दरवर्षी भरतात.
याबद्दल बोलताना रवींद्र मेटकर म्हणाले, गेल्या दोन वर्षांपासून अंजनगाव बारी गावाला उन्हाळ्यात शेतातल्या विंधन विहीरीवरून पाणी देत आहे. मानवतेच्या दृष्टीकोनातून हा निर्णय घेतला असून तृष्णा भागविणे हे पुण्याचे काम असून यंदाही गावाला पाणी दिले आहे. नफा-नुकसानीचा विचार आम्ही करत नाही. पाणी दिल्यावर गावकर्‍यांच्या चेहर्‍यावर जे समाधान झळकते, तेच आमच्यासाठी लाखमोलाचे असल्याची प्रतिक्रिया यावेळी रवींद्र मेटकर यांनी दिली.
