अकोला - मूर्तिजापूर रोडवरील नवसाळा फाट्यावर शिवशाही आणि ट्रकचा अपघात झाला आहे. या अपघातात शिवशाही मधील ४० ते ५० प्रवासी जखमी झाले. ही घटना राष्ट्रीय महामार्ग क्रमांक ६ वर आज (सोमवार) सकाळी ९ वाजण्याच्या सुमारास घडली.
शिवशाही बस आणि ट्रक अपघात
नागपूरकडे जाणारी नाशिक-नागपूर शिवशाही बस मुर्तीजापूर नरसाळा फाट्याजवळ येताच समोरून अकोल्याकडे येणाऱ्या ट्रकने बसला जोरदार धडक दिली. या धडकेत ट्रक पलटी झाला. तर शिवशाहीच्या समोरचा भाग पूर्णपणे क्षतीग्रस्त झाला. या अपघातानंतर महामार्गावरील वाहतूक ठप्प झाली होती. पोलिसांनी घटनास्थळी येवून वाहतूक सुरळीत केली.
जखमींना उपचारासाठी अमरावती येथे पाठवण्यात आले. तर, काही किरकोळ जखमींना मुर्तीजापुर उपजिल्हा रुग्णालयात पाठवण्यात आले. यामध्ये जखमींचा मृत्यू झाल्याची अद्याप कुठलीही माहिती नाही.
