'त्या' दोन बेपत्ता व्यक्तींपैकी एकाचा शोध लागला, दुसऱ्याचा पोलिसांकडून तपास सुरू

शासकीय वैद्यकीय महाविद्यालयामधून दोन रुग्ण बेपत्ता झाले होते. त्यातील एका व्यक्तीचा शोध लागला असून एकजण अद्याप बेपत्ता आहे. पोलीस त्याचा शोध घेत आहेत.

अकोला - शासकीय वैद्यकीय महाविद्यालयामधून दोन रुग्ण बेपत्ता झाले होते. त्यातील एक व्यक्ती देवराव वाघमारे यांचा शोध लागला आहे. तर दुसरी व्यक्ती अविनाश लोखंडे हे अद्यापही बेपत्ता आहेत. या रुग्णांचे नातेवाईक रुग्णालय प्रशासन आणि पोलीस अधीक्षकांकडे विचारपूस करतात. मात्र, त्यांच्याकडून तपास सुरू आहे, असेच उत्तर मिळत असल्यामुळे त्यांची चिंता वाढली आहे.

अविनाश लोखंडे हा मानसिक रुग्ण पाच वर्षांपासून केळकर सन्मित्र मानस व व्यसनमुक्ती केंद्रात उपचारार्थ दाखल आहे. कोरोनाचा संसर्ग झाल्यानंतर शासकीय वैद्यकीय महाविद्यालयातील कोविड रुग्णालयात दाखल केल्यापासून ते बेपत्ता आहेत. त्यांना शासकीय वैद्यकीय महाविद्यालय प्रशासनाने मूर्तिजापूर येथे सोडले होते. लोखंडे यांचा पत्ता मूर्तिजापूर असा महाविद्यालयात देण्यात आल्यामुळेच त्यांना तिथे सोडण्यात आले असल्याचे प्रशासनाकडून सांगण्यात येत आहे. परंतु, लोखंडे यांचे मित्र शिवराज कुलकर्णी यांनी सांगितले की, अविनाश मूळचे अमरावती जिल्ह्यातील असून त्यांचा मूर्तिजापूर या गावाशी दूरदूरपर्यंत संबंध नाही. असे असताना त्यांना जाणीवपूर्वक तर मूर्तिजापूर येथे सोडून देण्यात आले नाही ना? असा प्रश्न उपस्थित होत आहे. त्यामुळे आता मानसिकदृष्ट्या आजारी असलेले अविनाश लोखंडे हे मूर्तिजापूरमधून नेमके गेले कुठे? हा प्रश्न आहे. त्यांना शोधण्यासाठी पोलिसांना घाम गाळावा लागत आहे.

हेही वाचा - अमृत योजनेची कामे पूर्ण करा; शिवसेना पदाधिकाऱ्यांचे मोबाईल टॉवरवर चढून सिनेस्टाइल आंदोलन

तर दुसरीकडे बुलढाणा जिल्ह्यातील देवराव वाघमारे हे 23 ऑगस्टपासून शासकीय वैद्यकीय महाविद्यालयामधून बेपत्ता होते. त्यांचा शोध महाविद्यालय प्रशासनाने रुग्णालय परिसरामध्ये घेतला. त्यानंतर त्यांनी शहर कोतवाली पोलीस ठाण्यात याबाबत तक्रार दाखल केली. त्यानंतर देवराव वाघमारे यांचे बंधू गजानन वाघमारे यांनी जिल्हा प्रशासनाला आत्मदहनाचा इशारा दिला होता. ज्या दिवशी ते आत्मदहन करणार होते, त्याच दिवशी सकाळी देवराव वाघमारे हे अकोला बसस्थानकावर सापडले. त्यामुळे पोलिसांचा एका प्रकरणात जीव भांड्यात पडला असला तरी अविनाश लोखंडे यांना शोधण्याचे आव्हान पोलिसांसमोर आहे.

देवराव वाघमारे यांचा शोध लागला असून अविनाश लोखंडे यांचा शोध घेतला जात आहे. त्यांना शोधण्यात आम्हाला यश मिळेल, असा आशावाद सिटी कोतवाली ठाणेदार उत्तम जाधव यांनी व्यक्त केला आहे.

हेही वाचा - 15 हजारांची लाच स्वीकारल्याप्रकरणी बीडीओसह कनिष्ठ लिपिक एसीबीच्या जाळ्यात