नवी दिल्ली - सहा वेळा विश्वविजेती महिला बॉक्सर एमसी मेरी कोम आणि निखत झरीन यांच्यामध्ये (५१ किलो वजनी गटासाठी) टोकियो ऑलिम्पिक पात्रतेसाठी लढत होणार आहे. निखतने केंद्रीय क्रीडामंत्री किरेन रिजिजू यांना पत्र लिहून ऑलिम्पिक मुष्टियुद्धात महिलांच्या ५१ किलो वजनी गटात आपली दावेदारी सांगितली. त्यामुळे अनुभवी मेरी आणि नवोदित निखत चाचणी लढतीत एकमेकींना भिडणार हे स्पष्ट झाले आहे.
मुष्टियुद्ध महासंघानेही (बीएफआय) या लढतीला मंजुरी दिली आहे. डिसेंबर महिन्यात निखत आणि मेरी कोम यांच्यातील ही चाचणी लढत होऊ शकते. या लढतीशिवाय महिलांच्या ६९ किलो वजनी गटातील ऑलिम्पिक पात्रतेसाठी लोवलिना बोर्गोहेन हिलाही चाचणी लढत खेळावी लागणार आहे. याची माहिती बीएफआयचे अध्यक्ष अजय सिंह यांनी दिली.
सहा वेळा विश्वविजेती मेरी कोमला नुकत्याचा पार पडलेल्या जागतिक अजिंक्यपद बॉक्सिंग स्पर्धेत कास्यपदकावर समाधान मानावे लागले. तिने रौप्य अथवा सुवर्णपदक पटकावले असते तर ऑलिम्पिकसाठी तिची थेट निवड करण्यात आली असती. त्यात निखतने ५१ किलो वजनी गटातून दावेदारी सांगितली. त्यामुळे निखत-मेरीमध्ये चाचणी लढत होणार आहे. दरम्यान, मेरीने चाचणीसाठी कधीही नकार दिलेला नाही.
हेही वाचा - नेमबाजी : भारतीय नेमबाजपटू चिंकी यादवने मिळवले ऑलिम्पिक तिकीट
हेही वाचा - मराठमोळी नेमबाजपटू तेजस्विनी सावंतने मिळवले टोकियो ऑलिम्पिकचे तिकीट
