हैदराबाद - इंडियन प्रीमियर लीगच्या (आयपीएल) इतिहासातील सर्वात वयस्कर खेळाडू प्रवीण तांबे पुन्हा एकदा आयपीएलमध्ये दिसणार आहे. मात्र, यंदाच्या हंगामात तो खेळाडू म्हणून उपलब्ध नसेल. कोलकाता नाइट रायडर्स (केकेआर) संघामध्ये तो प्रशिक्षक कर्मचाऱ्यांपैकी (कोचिंग स्टाफ) एक असेल. वयाच्या ४१व्या वर्षी तांबेने आयपीएलमध्ये पदार्पण केले होते.
संघाचे मुख्य कार्यकारी अधिकारी वेंकी म्हैसूर यांनी ही माहिती दिली. म्हैसूर म्हणाले, ''यूएई खेळपट्ट्या फिरकीपटूंना उपयुक्त ठरतील आणि यामुळे संघ व्यवस्थापनाच्या मागणीमुळे प्रवीण तांबेला कोचिंग स्टाफमध्ये स्थान देण्यात आले आहे. तांबे फिरकीपटूंना उपयुक्त ठरणाऱ्या खेळपट्टीवर फलंदाजांना तयार करण्यात महत्त्वाची जबाबदारी पार पाडेल. सीपीएलमध्ये न खेळलेल्या सामन्यातही त्याने मैदानाच्या बाहेरून सक्रिय भूमिका बजावली, ड्रिंक्सब्रेकमध्येही तो मैदानावर जात होता आणि सीमारेषेबाहेरूनही खेळाडूंनाही उत्तेजन देत होता.''
गेल्यावर्षी डिसेंबरमध्ये झालेल्या लिलावात केकेआरने तांबेला २० लाख रुपयांमध्ये संघात घेतले होते. परंतु नियमांचे उल्लंघन केल्यामुळे बीसीसीआयने त्याला या लीगमध्ये खेळण्यास बंदी घातली होती. २०१८मध्ये त्याने परदेशी टी-१० लीगमध्ये भाग घेतला होता.
बीसीसीआयच्या नियमांनुसार, केवळ निवृत्त खेळाडूच विदेशी लीगमध्ये भाग घेऊ शकतात. मंडळाच्या मते तांबेने या नियमाचे उल्लंघन केले. त्यानंतर तांबेने क्रिकेटमधून निवृत्तीची घोषणा केली आणि नुकताच तो वेस्ट इंडिजमधील कॅरेबियन प्रीमियर लीगमध्ये (सीपीएल) खेळला. या लीगमध्ये खेळणारा तो पहिला भारतीय खेळाडूही ठरला.
१० सप्टेंबर रोजी संपलेल्या सीपीएल लीगमध्ये तो शाहरुख खानच्या मालकीच्या आणि यंदाच्या विजेत्या त्रिनबागो नाइट रायडर्स संघातून खेळताना दिसला. प्रवीण तांबेने वयाच्या २०१३मध्ये राजस्थान रॉयल्स संघातून आयपीएलमध्ये प्रवेश केला होता. त्याने आयपीएलमधील ३३ सामन्यांत २८ बळी घेतले आहेत.
