माउंट माउनगुई - न्यूझीलंड संघाने वर्षाचा शेवट विजयाने केला. पाकिस्तानविरुद्ध सुरू असलेल्या दोन कसोटी सामन्याच्या मालिकेतील पहिला सामना यजमान संघाने १०१ धावांनी जिंकत मालिकेत १-० अशी आघाडी घेतली. पाचव्या दिवशी पाकिस्तानचा संघ ३७२ धावांचा पाठलाग करताना २७१ धावांवर ऑलआऊट झाला.
पाचव्या दिवशी पाकिस्तानने ३ बाद ७१ धावांवरुन खेळण्यास सुरूवात केली. फवाद आलमने तब्बल ११ वर्षानंतर कसोटी क्रिकेटमध्ये शतक झळकावले. त्याचा अडथळा नील वॅग्नर याने दूर केला. फवादने २६९ चेंडूत १०२ धावांची खेळी केली. फवाद बाद झाल्यानंतर पाकिस्तानच्या संघाला २७१ धावांपर्यंत मजल मारता आली.
न्यूझीलंडकडून पहिल्या डावात कर्णधार केन विल्यमसनने १२९ धावांची खेळी केली. त्याच्या या खेळीच्या जोरावर न्यूझीलंडने ४३१ धावा धावफलकावर लावल्या. यात रॉस टेलर, हेन्री निकोलस आणि वीजे वॉटलिंग यांच्या अर्धशतकांचा देखील समावेश आहे. पाकिस्तानचा वेगवान गोलंदाज शाहीन शाह आफ्रिदीने पहिल्या डावात ४ गडी बाद केले. यानंतर पाकिस्तानचा पहिला डाव २३९ धावांत आटोपला. तेव्हा न्यूझीलंडला पहिल्या डावात १९२ धावांची आघाडी मिळाली. न्यूझीलंडने आपला दुसरा डाव ५ बाद १८० धावांवर घोषित करत पाकिस्तानसमोर विजयासाठी ३७२ धावांचे आव्हान ठेवले होते.
अखेरच्या दिवशी फवाद आलम आणि मोहम्मद रिजवान या जोडीने न्यूझीलंडच्या गोलंदाजीचा धैर्याने सामना केला. ही जोडी फुटल्यानंतर न्यूझीलंडच्या गोलंदाजांनी पाकिस्तानच्या फलंदाजांवर वर्चस्व मिळवले. अखेर पाकिस्तानचा संघ २७१ धावा करू शकला. पहिल्या डावात शतक आणि दुसऱ्या डावात २१ धावा करणाऱ्या केन विल्यमसनला सामनावीरच्या पुरस्काराने गौरवण्यात आले.
हेही वाचा - फवाद आलम...तब्बल ११ वर्षांनी शतक ठोकणारा पाकिस्तानी फलंदाज
हेही वाचा - डेव्हिड वॉर्नरची ऑस्ट्रेलिया संघात वापसी; जो बर्न्सला वगळलं
