मुंबई - ‘स्टार प्रवाह’वर सुरू झालेल्या ‘रंग माझा वेगळा’ या मालिकेतील सौंदर्या इनामदार म्हणजेच हर्षदा खानविलकरच्या लूकची सध्या सगळीकडेच चर्चा आहे. सौंदर्या इनामदारचा हा लूक कॉश्च्युम डिझायनर शाल्मली टोळ्ये हिने डिझाईन केला आहे. शाल्मली स्वत: एक अभिनेत्री आणि नृत्यांगनाही आहे.
‘रंग माझा वेगळा’ या मालिकेतील सौंदर्या या व्यक्तीरेखेसाठी हर्षदा यांचा लूक डिझाईन करणे शाल्मलीसाठी मोठे आव्हान होते. याआधी हर्षदा यांच्या 'पुढचं पाऊल' या मालिकेतील अक्कासाहेब या व्यक्तिरेखेला तुफान लोकप्रियता मिळाली होती. अक्कासाहेबांच्या साड्या आणि दागिने यांचे महिलावर्गात विशेष आकर्षण होते आणि आजही आहे. त्यामुळे नवीन मालिकेसाठी हर्षदाचा लूक डिझाईन करताना या गोष्टी प्रामुख्याने टाळल्या.
हेही वाचा - 'मधुबाला'वर बनणार बायोपिक? इम्तियाज अलीने दिलं स्पष्टीकरण
सौंदर्या इनामदार ही अतिशय हुशार आणि करारी अशी बिझनेस वुमन आहे. नावातच सौंदर्य आहे, त्यामुळे सौंदर्यावर प्रेम करणारी अशी ही व्यक्तिरेखा आहे. या व्यक्तिरेखेला शोभेल असा पेहराव तयार करण्यात आला. पेस्टल शेड्सच्या साड्या आणि कमीत-कमी मात्र, हमखास छाप पाडणारे दागिने सौंदर्याच्या व्यक्तिरेखेसाठी वापरण्यात आले आहेत. हर्षदा ताईंच्या या लूकलाही प्रेक्षकांची पसंती मिळत असल्याचा आनंद आहे, अशी प्रतिक्रिया शाल्मलीने व्यक्त केली.
हेही वाचा - लतादीदींची प्रकृती स्थिर, आशा भोसले आणि उषा मंगेशकर घेताहेत दीदींची काळजी
कोणतीही व्यक्तिरेखा साकारताना ती कशी दिसते हे माझ्यासाठी खूप महत्त्वाचे आहे. लूक डिझाईन करताना त्यात मी माझी मते मांडत असते. यावेळी मात्र सौंदर्याच्या लूकचे संपूर्ण श्रेय कॉश्च्युम डिझायनर शाल्मली टोळ्येला आहे. अक्कासाहेबांच्या पेहरावाची छाप सौंदर्याच्या लूकमध्ये कुठेही दिसत नाही, हेच या व्यक्तिरेखेचे यश आहे. आत्तापर्यंत अक्कासाहेबांच्या भूमिकेमधून प्रेक्षकांनी भरभरुन प्रेम दिले आहे. आता ‘रंग माझा वेगळा’ मालिकेतील माझा नवा अंदाजही प्रेक्षकांना नक्कीच आवडेल, असे हर्षदा खानविलकर म्हणाल्या.
