सध्या विम्बल्डन टेनिस टूर्नामेंट सुरु आहे. भारताची एकेकाळची ‘ऑन-कोर्ट’ डबल्स-जोडी लिअँडर पेस आणि महेश भूपती यांनी एकत्रितपणे अनेक टेनिस स्पर्धा जिंकल्या परंतु अनेक जोड्यांप्रमाणे त्यांच्याही दोस्तीत ‘ब्रेक पॉईंट’ आला. एकेकाळचे जिवलग मित्र असलेल्यांवर अशी वेळ आली की ते एकमेकांचे तोंडही बघू शकत नव्हते. त्यांच्या ह्या ‘ब्रोमान्स ते ब्रेक पॉईंट’ पर्यंतचा प्रवास आता वेब सिरीज मध्ये कैद होतोय. त्यासाठीच #ली-हेश म्हणजेच लिअँडर पेस आणि महेश भूपती एकत्र आलेत ‘ब्रेक पॉईंट’ या डॉक्यु-ड्रामा साठी. यात त्यांचा दोस्ती पासून दुश्मनी पर्यन्तचा प्रवास दर्शविण्यात येणार असून ‘ऑन-कोर्ट’ आणि ‘ऑफ-कोर्ट’ आयुष्य देखील चितारलं जाणार आहे. महत्वाचे म्हणजे याचे दिग्दर्शन करणार आहेत अनेक पुरस्कार विजेते दिग्दर्शक नवरा-बायको जोडी नितेश तिवारी आणि अश्विनी अय्यर तिवारी.
१९९९ साली लिअँडर पेस आणि महेश भूपती ही टेनिस डबल्स ची नं १ जोडी होती. तसेच त्यांच्याविरुद्ध खेळताना इतर जोड्या थोड्याफार बिचकूनच खेळायच्या एव्हडा त्यांचा दरारा होता. वर्षानुवर्षे एकमेकांच्या संपर्कात नसलेले हे दोघे ४ जुलै ला अचानक आपल्या विम्बल्डन विजयाच्या २२व्या स्मृतिदिनाबद्दल एकमेकांना ‘ट्विट’ करू लागले आणि लोकांच्या भुवया उंचावल्या. तेव्हाच लोकांना कल्पना आली होती की ‘दाल में कुछ काला हैं’. आता ‘ब्रेक पॉईंट’ जाहीर झाल्यानंतर त्यावर शिक्कामोर्तब झालंय.
‘ब्रेक पॉईंट’ मधून या भारतीय टेनिस दिग्गजांचा खेळातील उंची तसेच खाजगी जीवनातील चढउतार दर्शविले जाणार असून प्रेक्षकांना खिळवून ठेवेल अशी त्याची मांडणी असेल. श्रद्धा, कठोर परिश्रम, महत्वाकांक्षा, संघर्ष आणि विवाद हे तर असणारच आहे परंतु यापेक्षाही ही एक आशेची कहाणी असेल जी सर्व विसंगती असूनही एकत्र कसे राहता येते हे अधोरेखित करेल. दंगल, पंगा, छिचोरे, नील बट्टे सन्नाटा, बरेली की बर्फी अश्या असाधारण चित्रपटांसाठी ओळखल्या जाणाऱ्या अश्विनी अय्यर तिवारी आणि नितेश तिवारी यांच्या अर्थस्काय पिक्चर्स च्या बॅनरखाली याची निर्मिती होत आहे आणि झी५ याचे प्रसारण करेल.
झी एंटरटेनमेंट एंटरप्राइजेस लिमिटेडचे डिजिटल बिझिनेस आणि प्लॅटफॉर्मचे अध्यक्ष अमित गोयंका म्हणाले, “झी५ मध्ये ग्राहक आनंद आणि अखंडित अनुभव आमच्या दृष्टीकोनाचा अविभाज्य घटक आहे. ‘ब्रेक पॉइंट’ सह, आम्ही मनोरंजनाचा वेगळा पण मानवीय भावभावनांचा धांडोळा प्रेक्षकांसमोर पेश करणार आहोत.”
झी५ बरोबरच्या भागीदारीवर भाष्य करताना अश्विनी अय्यर तिवारी आणि नितेश तिवारी यांनी संयुक्त निवेदनात म्हटले आहे की, “‘ब्रेक पॉइंट’ ही लिअँडर पेस आणि महेश भूपती यांच्या व्यावसायिक आणि वैयक्तिक जीवनातील चढउतारांद्वारे त्यांच्या अविश्वसनीय प्रवासाची भावनात्मक दृष्ट्या हेलावणारी कहाणी आहे. या शोच्या माध्यमातून आम्ही कठोर परिश्रम, संघर्ष, विश्वास, भावना आणि महत्वाकांक्षा यांची एक अनुकरणीय कहाणी पेश करणार आहेत आणि भारतीय टेनिसमधील काही अत्यंत महत्त्वाचे क्षण दर्शविणार आहोत. आम्ही ही स्वारस्यपूर्ण कथा झी५ च्या माध्यमातून आणत आहोत याचा आम्हाला आनंद आहे. "
“आमचा २० वर्षांचा प्रवास म्हणजे यश, संघर्ष, अपयश, निराशा आणि मैत्री यांचे संवेदनशील मिश्रण आहे. अश्विनी अय्यर तिवारी आणि नितेश तिवारी यांच्याखेरीज हे कागदावर आणि स्क्रीनवर उतरविण्यासाठी उत्तम कोणीही नाही.” महेश भूपती म्हणाला. लिअँडर पेस म्हणाला, “आमची कहाणी सर्वांसोबत सामायिक करण्यास मी खरोखर उत्साही आहे. गेल्या अनेक वर्षांपासून लिअँडर आणि महेश यांच्याबद्दल बर्‍याच चर्चा झाल्या आहेत, परंतु पुढच्या पिढीला प्रेरणा देण्याची आणि वर्षानुवर्षे आम्हाला साथ देणाऱ्यांबरोबरचे क्षण शेअर करण्याच्या कल्पनेने मला हो म्हणण्यास उद्युक्त केले. ‘ब्रेक पॉईंट’ मधून मैत्री टिकविण्यासाठी कोणत्या दिव्यांतून जावे लागते हे कळेल.”
ही वेब सिरीज केवळ टेनिस प्रेमींना खेळ-दौर्‍यावर नेणार नाही तर त्यामध्ये ‘फॅन बॉक्स’ नावाची एक अनोखी संकल्पना देखील असेल ज्यात तिथे सोडलेल्या प्रेक्षकांच्या प्रश्नांना लिअँडर पेस आणि महेश भूपती स्वतः उत्तरं देतील.
हेही वाचा - सलमान खानसह ७ जणांवर कथित फसवणूक प्रकरणी समन्स
