नवी दिल्ली - सुप्रसिद्ध लेखक चेतन भगत यांचं 'हाफ गर्लफ्रेंड' हे पुस्तक अश्लील असल्याचे रेल्वे प्रवासी सुविधा कमीटीचे चेअरमन रमेश चंद्र रत्न यांनी म्हटले आहे. त्यामुळे हे पुस्तक रेल्वे स्टेशनवरून हटवण्याचे त्यांनी आदेश दिले आहे. हे पुस्तक वाचण्यासारखं नाही. तसेच, पुस्तकाच्या शीर्षकावरही प्रश्नचिन्ह उमटवत अशाप्रकारची पुस्तकं स्टेशनवर विकली जाऊ नये, असेही त्यांनी म्हटले आहे.
रमेश चंद्र रत्न हे कमिटीच्या इतर सदस्यांसोबत नवी दिल्लीच्या रेल्वे स्टेशनवर पोहोचले होते. प्लॅटफॉर्म नंबर १६ वर असलेल्या बुक स्टॉलवर जेव्हा त्यांनी 'हाफ गर्लफ्रेंड' हे पुस्तक पाहिले तेव्हा त्यांनी हे पुस्तक विक्री न करण्याचे आदेश दिले.
या पुस्तकाचे शीर्षक तसेच, यातून दिला जाणारा संदेश हा अश्लील आहे, असे ते यावेळी म्हटले.
'हाफ गर्लफ्रेंड' हे चेतन भगतचे प्रसिद्ध पुस्तक आहे. यावर आधारित चित्रपटही तयार करण्यात आला आहे. याबद्दल बऱ्याच समीक्षकांनीही आपली मतेही मांडली आहेत. मात्र, आत्तापर्यंत कोणीही हे पुस्तक अश्लील आहे, असे म्हटले नव्हते. आता यावर चेतन भगत काय प्रतिक्रिया देतात, हे पाहणे महत्वाचे ठरेल.
