अहमदनगर - प्रजासत्ताक दिनाच्या पूर्वसंध्येला पद्मश्री पुरस्कारांची घोषणा झाली. यात निर्माती एकता कपूरला हा मानाचा पुरस्कार जाहीर झाला. हा आपल्यासाठी मोठा धक्का होता, असे एकताने म्हटलंय. आज तिने वडील जितेंद्र यांच्यासह शिर्डीत येऊन साई समाधीचे दर्शन घेतले.
यावेळी माध्यमांशी एकता बोलत होती. पद्मश्री पुरस्कार जाहीर झाल्याचा फोन मंत्रालयातून आला तेव्हा धक्का बसल्याचे तिने सांगितले. इतका मोठा पुरस्कार मिळेल अशी अपेक्षा ठेवली नव्हती, असे ती म्हणाली. यापुढेही नव्या टॅलेंटसाठी काम करणार असल्याचे तिने सांगितले.
अभिनेता जितेंद्र यांनी साईबाबांचा आशीर्वाद आपल्यावर असल्याचे सांगितले. मुलीला मिळालेल्या पद्मश्री पुरस्काराबद्दल भारत सरकार आणि साईबाबांचे त्यांनी आभार मानले. १९७३ पासून आपण शिर्डीला येत असल्याचे सांगत बाबांचा आशीर्वाद कायम राहवा अशी इच्छा बोलून दाखवली.
एकता शिर्डीत पोहोचल्यानंतर मंदिर परिसरातील दुकानातून तिने साईंची प्रतिमा असलेली अंगठी जितेंद्र यांच्यासाठी खरेदी केली. ही अंगठी तिने साईचरणावर ठेवत जितेंद्र यांना दिली. यामुळे जितेंद्र भारावले.
साईंचे दर्शन घेतल्यानंतर साईबाबा संस्थानाच्या वतीने त्यांना साईंची मूर्ती आणि प्रतिमा देऊन एकता आणि जितेंद्र यांचा सत्कार करण्यात आला. यावेळी साई संस्थानाचे पदाधिकारी उपस्थित होते. यानंतर एकता आणि जितेंद्र नाशिकच्या दिशेने रवाना झाले.
