पुणे - जेवढी मराठी लोकांना कॉमिडी कळते तेवढी कोणालाच कळत नाही. मराठी शब्दात, मराठी भावार्थत वेगळेपण आहे. प्रत्येक क्षणात वेगवेगळे अर्थ काढू शकतो, असं वेगळेपण कुठेही नाही. बाकीच्या लोकांची कॉमेडी ही वेगळीच आहे. हिंदीच्या कॉमेडी बद्दल न बोललेलंच बरं..कॉमेडीमध्ये घुसडेगिरी जे आहे ना ते खूप वाईट असून याचा परिणाम तुमच्यासोबत असलेल्या दुसऱ्या कलाकाराला होतो. तसेच शोधक वृत्ती ठेवली तर आयुष्यात बरेच काही मिळते. मी वेळीवेळी सगळ्यांकडून शिकत राहिलो आणि समृद्ध होत गेलो, असे मत ज्येष्ठ अभिनेता अशोक सराफ (Ashok Saraf ) यांनी व्यक्त केलं आहे.
पुणे फिल्म फाउंडेशन आणि महाराष्ट्र सरकार यांच्या संयुक्त विद्यमाने आयोजित एकोणिसाव्या पुणे आंतरराष्ट्रीय चित्रपट महोत्सवामध्ये भारतीय चित्रपट सृष्टीतील योगदानाबद्दल अशोक सराफ यांना गौरविण्यात आले. त्यानिमित्ताने आज पत्रकार परिषदेचे आयोजन करण्यात आलं होतं. त्यावेळी ते बोलत होते. यावेळी महोत्सवाचे संचालक डॉक्टर जब्बार पटेल उपस्थित होते.
चार्ली चॅप्लिन यांच्याकडून विनोदातील कारुण्य समजले
कोणी गुरु नसला तरी अनेकांकडून अनेक गोष्टी मी शिकत गेलो. मी मूळचा बेळगावचा पण वाढलो मुंबईमध्ये. मामांची नाटक कंपनी होती. त्यातून ही अभिनयाची कला पुढे आली. मामा रघुवीर सावकार, गोपीनाथ सावकार यांच्याकडून अनेक गोष्टी शिकायला मिळाल्या.चार्ली चॅप्लिन यांच्याकडून विनोदातील कारुण्य समजले. लॉरेल हार्डी यांचा स्लॅपस्टिक विनोद भावला. राजा गोसावी यांची शब्दफेक आवडली. त्यातून पुढे गेलो, आयुष्यात शोधक वृत्ती ठेवली तर बरेच काही मिळवता येते. मी आजही गोष्टी स्वतः करून बघतो, तेच माझ्या थोड्याफार यशाचे रहस्य आहे, असे यावेळी सराफ म्हणाले.
अशोक सराफ यांच्या पन्नास वर्षाची अभिनय कारकिर्दीचा प्रवास या वेळी उलगडत गेला. तब्बल 250 मराठी चित्रपट, मराठी नाटके, हिंदी चित्रपट आणि हिंदी मालिका अशी मोठी कारकिर्द असलेल्या सराफ यावेळी बोलते झाले.
विनोदी कलाकार अशी माझी एक इमेज झाली आणि याची मला खंत
आपले संवाद तालावर आधारित असतात. वयाच्या पाचव्या वर्षी पासून तबला वाजवत असल्याने ताल संवादात आला. प्रेक्षकांनाही तो आवडला. संशय कल्लोळ या नाटकांमध्ये आणि कळत नकळत या चित्रपटांमध्ये मी गाणी म्हटली आहेत. मी सुरांच्या जवळपास आहे मात्र सुरात नाही. म्हणून पुढे गाण्याचे धाडस केले नाही. विनोदी कलाकार अशी माझी एक इमेज झाली आणि याची मला खंत आहे. अर्थात लोकांनाही माझ्या याच भूमिका आवडल्या. त्यामुळे कलाकार म्हणून लोकांना जे हवय ते देत आलो. लोकांनी प्रेम खूप केले पण त्यांना एक उनाड दिवसमधल्या भूमिकासारख्या वेगळ्या भूमिका आवडल्या नाहीत. लोकांना शाब्दिक विनोद आवडला पण परिस्थितीनुसार होणारा विनोद आवडला नाही, असं देखील यावेळी सराफ म्हणाले.
हेही वाचा - Kangana Ranaut Apologizes : कंगना रणौतच्या कारला शेतकऱ्यांचा घेराव, अभिनेत्रीने मागितली माफी
