मुंबई - संगीत हा भारतीयांच्या जीवनातील अविभाज्य भाग आहे. त्यामुळेच चित्रपट संगीताबरोबरच म्युझिक सिंगल्स सुद्धा मोठ्या प्रमाणात पॉप्युलर होतात. अलीकडच्या काळात सिंगल व्हिडीओ साँग्ज रसिकांना मोहिनी घालण्यात यशस्वी होत आहेत. नवी कोरी गाणी संगीतप्रेमींच्या ओठांवर सहजपणे रूळतही आहेत. कैलाश पवार दिग्दर्शित प्राजक्ता फिल्म प्रॉडक्शनचे नवे कोरे गाणे ‘लंडनचा राजा... इटलीची राणी...’ नुकतेच प्रदर्शित करण्यात आले.
रेखा सुरेंद्र जगताप, नितीन माने आणि संजय शिंदे यांची निर्मिती असलेल्या 'लंडनचा राजा... इटलीची राणी...' या गाण्याच्या निमित्ताने रसिकांना एका नव्या कोऱ्या जोडीची ऑनस्क्रीन केमिस्ट्री अनुभवण्याची संधी मिळणार आहे. शीतल अहिरराव आणि अभिजीत श्वेतचंद्र या कलाकारांवर हे गाणे चित्रीत करण्यात आले आहे. नैतिक खरस आणि प्रफुल्ल कांबळे यांच्या लेखणीतून अवतरलेले हे गीत त्यांनीच संगीतबद्ध केले आहे. नैतिक आणि सोनाली सोनावणे यांच्या सुमधूर आवाजात हे गीत रेकॅार्ड करण्यात आले आहे. कैलाश काशिनाथ पवार यांनी या गाण्याचे दिग्दर्शन केले असून, अलिबागमधील निसर्गरम्य परिसरात हे गाणे शूट करण्यात आले आहे. गाण्याच्या माध्यमातून मनात उद्भवणाऱ्या काही तरल भावना रसिकांपर्यंत पोहोचवण्याच्या उद्देशाने हे गाणे बनवण्यात आल्याचे दिग्दर्शक कैलाश काशिनाथ पवार यांनी सांगितले.
अभिजीतने यापूर्वी 'व्वा पैलवान', 'तालीम', 'संजना' या चित्रपटांद्वारे लक्ष वेधून घेतले असून, सध्या तो स्टार प्रवाह वाहिनीवरील 'नवे लक्ष्य' या मालिकेत महत्त्वपूर्ण भूमिकेत आहे. तसेच 'व्हीआयपी गाढव' आणि 'एचटूओ' या मराठी चित्रपटांमध्ये झळकलेल्या शीतल अहिररावने आपल्या अभिनय कौशल्याच्या बळावर मराठी सिनेसृष्टीत आपले एक वेगळे स्थान निर्माण केले आहे. आपापल्या परीने स्वत:ला सिद्ध करणाऱ्या शीतल-अभिजीत यांच्या 'लंडनचा राजा... इटलीची राणी...' या गाण्यात रसिकांना अलिबागमधील निसर्गसौंदर्य पाहण्याची संधी मिळणार आहे.
हेही वाचा - देओल खानदानाची तिसरी आणि बडजात्या कुटुंबाची चवथी पिढी येतेय एकत्र!
