महाराष्ट्रातील चित्रपटगृहे पुन्हा सुरु झाल्यापासून हिंदी, मराठी चित्रपटांच्या प्रदर्शनासाठी रांगा लागल्या आहेत. येत्या व्हॅलेंटाईन डे च्या जवळपास 'वन फोर थ्री' नावाचा मराठी रोमँटिक चित्रपट प्रदर्शित होणार आहे. या चित्रपटाचे दिग्दर्शन केलंय योगेश भोसले यांनी आणि अभिनेत्री शीतल अहिरराव सोबत योगेश भोसले पडद्यावर रोमान्स देखील करताना दिसतील. रोमँटिक चित्रपटांच्या पठडीमध्ये वन फोर थ्री चित्रपटानेही आपले नाव नोंदविले आहे, प्रेमाची अनोखी परिभाषा प्रेक्षकांसमोर घेऊन येत 'शारदा फिल्म्स प्रॉडक्शन' निर्मित आणि विरकुमार शहा निर्मित 'वन फोर थ्री' हा प्रेममय भावना व्यक्त करणारा आणि खऱ्याखुऱ्या जीवनावर आधारित असलेल्या नव्याकोऱ्या चित्रपटाचे पोस्टर प्रेक्षकांच्या भेटीस आले आहे. दिग्दर्शक योगेश भोसले दिग्दर्शित प्रेमाचे विविध रंग दर्शविणाऱ्या या चित्रपटाचे पोस्टर प्रदर्शित करण्यात आले आहे.
श्रीमंत दगडूशेठ हलवाई, पुणे येथे गणपती बाप्पांच्या चरणी नतमस्तक होऊन समस्त चित्रपटाच्या टीमसह नव्या पोस्टरचे अनावरण करण्यात आले. चित्रपटाच्या पोस्टरवर दिग्दर्शक, अभिनेता योगेश भोसले आणि शीतल अहिरराव यांची केमिस्ट्री पाहायला मिळत आहे. तर अभिनेता वृषभ शहा या चित्रपटातून मराठी चित्रपटसृष्टीत दमदार असे पदार्पण करणार आहे. चित्रपटाचे संगीतकार आहेत पी. शंकरम तर छायाचित्रकार आहेत विकास सिंग. नृत्य दिग्दर्शक आर. कलाई कुमार, जे दाक्षिणात्य चित्रपटसृष्टीत नामांकित आहेत, यांचा हा पहिलाच मराठी सिनेमा आहे.
हे आपलं काळीज हाय या 'वन फोर थ्री' चित्रपटाच्या टॅगलाईनने आधीच धुमाकूळ घातला असताना हा चित्रपट काय नवे घेऊन येणार याची उत्सुकता शिगेला पोहोचली आहे. दिग्दर्शक योगेश भोसले म्हणाले की, ‘या चित्रपटातून प्रेक्षकांना प्रेमाचे वेगवेगळे रंग पाहायला मिळणार आहेत. त्यामुळे यंदाचा व्हॅलेंटाईन डे 'वन फोर थ्री' चित्रपटासोबत आनंदमयी जाईल. प्रेमाचे वेगळेपण या चित्रपटात काय अनुभवता येणार आहेत. दाक्षिणात्य चित्रपटांची धाटणी असलेला हा मराठीतील पहिला वहिला चित्रपट आहे.’
येत्या ११ फेब्रुवारी ला व्हॅलेंटाईन डे विकमध्ये ‘वन फोर थ्री' हा चित्रपट सिनेरसिकांच्या भेटीस येणार आहे.
