मुंबई - स्वतंत्र दिवस आणि प्रजासत्ताक दिन जवळ आले की देशप्रेमयुक्त चित्रपट व त्यांच्याबद्दल माहिती जास्त प्रमाणात फिरू लागते. या प्रजासत्ताक दिनीसुद्धा अनेक देशप्रेमी चित्रपटविषयक घोषणा झाल्या. वैशाली सरवणकर यांची निर्मिती असलेला 'मेरे देश की धरती' हा चित्रपटदेखील त्यातीलच एक आहे. या चित्रपटात दिव्येंदू शर्मा एका वेगळ्या भूमिकेत प्रेक्षकांना पहायला मिळणार आहे. ‘प्यार का पंचनामा’, ‘टॉयलेट एक प्रेम कथा’, ‘बत्ती गुल मीटर चालू’ या चित्रपटांसोबत ‘मिर्झापुर’, ‘बिच्छू का खेल’ या वेबसिरीजमध्ये आपल्या तगड्या अभिनयाने त्याने प्रेक्षकांची मने जिंकली. अल्पावधीतच आपल्या अभिनयाची छाप उमटवून हटके भूमिका साकारणारा हा अभिनेता कार्निवल मोशन पिक्चर्सच्या आगामी ‘मेरे देश की धरती’ या हिंदी चित्रपटातही झळकणार आहे.
मेरे देश की धरती... देश बदल रहा है
चित्रपटाच्या पोस्टरमध्ये मॉर्डन लूक व हातात कुदळ पकडलेला दिव्येंदू त्याच्या आजपर्यंतच्या ‘लूक्स’ च्या विपरीत दिसत असून तो खरोखरीच वेगळ्या धाटणीच्या भूमिकेत आहे हे दिसून येते. दोन इंजिनिअर तरुण स्वत:ची नोकरी करत असताना, काहीतरी वेगळे करून दाखवण्याची उर्मी जपण्यासाठी कसे शेतकरी बनतात, ह्याची हलकी फुलकी रंजक कथा ‘मेरे देश की धरती... देश बदल रहा है’ या चित्रपटातून उलगडणार आहे.
सध्या ’शेतकरी’ न्यूजमध्ये आहे व शेतकऱ्याची भूमिका वठवणारा दिव्येंदू म्हणाला की, ‘मला खूप अभिमान वाटतो की, मी शेतकऱ्याच्या एका वेगळ्या भूमिकेत काम करू शकलो. आज आपल्या देशात असंख्य शेतकरी खडतर मेहनत करून सुद्धा पोटभर जेऊ शकत नाहीत. हे चित्र नव्या विचारांनी बदलले जाऊ शकते त्यासाठी तरुण नेतृत्वाने पुढे येऊन काहीतरी करण्याची गरज आहे, हा संदेश देणारा हा चित्रपट आणि तशा धाटणीची माझी भूमिका रसिकांना नक्की आवडेल असा विश्वास आहे.’
‘मेरे देश की धरती’ या चित्रपटाची संकल्पना डॉ. श्रीकांत बासी यांची आहे. चित्रपटाचे दिग्दर्शन फराझ हैदर यांनी केलं असून संवाद पियुष मिश्रा यांनी लिहिले आहेत. चित्रपटाला साजेसं संगीत विक्रम मॉण्टेरोज यांनी दिले असून छायांकन हरी वेदांतम यांचे आहे. नृत्यदिग्दर्शन पवन आणि बॉब यांचे आहे. ‘मेरे देश की धरती' मध्ये दिव्येंदू शर्मा सोबत अनंत विधात आणि अनुप्रिया गोएंका, ईंनाम्युलहक, ब्रिजेंद्र काला, राजेश शर्मा, अतुल श्रीवास्तव, फारुख झफर या प्रतिभावान कलाकारांच्यासुद्धा भूमिका आहेत. हा चित्रपट लवकरच प्रेक्षकांच्या भेटीला येईल.
हेही वाचा - ठाणे : भिवंडी एमआयडीसीत भीषण आग
