ठाणे - डोंबिवली पूर्वेकडील मानपाडा रोडवरील चार रस्ता येथील गीतांजली सलूनच्या डिस्प्ले बोर्डाला शॉर्टसर्किटमुळे आग लागली. या आगीमुळे दुसऱ्या मजल्यावर एका खासगी रुग्णालयात उपचार घेणाऱ्या रुग्णांना आगीच्या धुराचा त्रास सहन करावा लागला. दरम्यान नुकत्याच शस्त्रक्रिया झालेल्या रुग्णाला एका दुकानात हलवण्यात आले.
मानपाडा रोडवरील गीतांजली सलूनच्या डिस्प्ले बोर्डाला शुक्रवारी दुपारी साडेआकराच्या सुमारास आग लागल्याने परिसरात खळबळ उडाली. या आगीमुळे नागरिकांनी रस्त्यावर मोठी गर्दी करून वाहतूक कोंडी केली. काही वेळातच आगीने रौद्ररूप धारण केल्याने अग्निशामक दलाला घटनेची माहिती देण्यात आली. माहिती मिळताच अग्निशमन दलाच्या 3 गाड्या घटनास्थळी दाखल होऊन झाल्या. अग्निशमन विभागाच्या जवानांनी आगीवर नियंत्रण मिळवले. मात्र इमारतीच्या दुसऱ्या मजल्यावरील खासगी रुग्णालयात एका रुग्णांचे नुकतेच ऑपरेशन झाले होते. त्या रुग्णाला आगीच्या धुराचा त्रास होऊ नये, म्हणून इमारतीच्या तळ मजल्यावरील एका दुकानात हलविण्यात आले. या आगीत कोणतीही जीवितहानी झाली नाही. मात्र वित्तहानी मोठ्या प्रमाणात झाल्याची माहिती सूत्रांनी दिली.
