पुणे - राज्यातील निर्बंध शिथिल करण्यासाठी पाच टप्पे तयार करण्यात आले आहेत. यामध्ये पॉझिटिव्हीटी दर व ऑक्सिजन बेडची उपलब्धता यानुसार जिल्ह्यांची वर्गवारी केली आहे. त्या जिल्ह्यांमधील गेल्या आठवड्यातील आकडेवारीनुसार कोणत्या वर्गवारीत त्याचा समावेश असेल ते ठरवण्यात आले आहेत. दरम्यान, राज्य सरकारच्या आदेशात असलेल्या निकषांनुसार पुणे जिल्हा चौथ्या टप्यात अनलॉक होण्याची शक्यता वर्तविली जात आहे. राज्यसरकारने अनलॉक करताना पुणे शहर आणि जिल्ह्याबाबत वेगळा निर्णय घेण्यात यावे. कारण जिल्हात पॉझिटिव्ही दर जास्त असून पुणे शहरात कमी आहे. त्यामुळे शहर आणि जिल्ह्याबाबत वेगवेगळ निर्णय घेण्यात यावे, असे पुण्याचे महापौर मुरलीधर मोहोळ यांनी सांगितले आहे.
शहर आणि जिल्ह्याचे स्तर वेगवेगळे करण्यात यावे
राज्याचा विचार करून राज्य शासनाने हि नियमावली केली आहे. पण, याच्यात अडचण अशी आहे की शहर आणि जिल्ह्याच्या पॉझिटिव्ही दरामध्ये खूप फरक आहे. पुणे जिल्ह्यात 10 टक्के पेक्षा जास्त पॉझिटिव्ही दर आहे तर पुणे शहरात 5 टक्क्यांपेक्षा कमी आहे. या आदेशात शहर व जिल्हा असे वेगवेगळ आदेश दिसून येत नाही. सरसकट जिल्ह्याप्रमाणे आदेश काढण्यात आले आहे. त्यामुळे राज्य शासनाने जिल्हा आणि शहर याबाबत स्पष्टता द्यावी. शहर आणि जिल्ह्याचे स्तर वेगवेगळे करण्यात यावे, असेही यावेळी महापौर मुरलीधर मोहोळ म्हणाले.
चौथ्या टप्प्यात हे राहणार सुरू
राज्यातील निर्बंध शिथिल करण्यासाठी लागू केलेल्या टप्प्यांमध्ये पुणे जिल्हा चौथ्या टप्यात येत आहे.
- सकाळी 7 ते दुपारी 2 वाजेपर्यंत (सोमवार ते शुक्रवार) अत्यावश्यक सेवेतील दुकाने सुरू राहणार
- अत्यावश्यक सेवा वगळता इतर दुकाने पूर्णवेळ बंद राहणार
- सिनेमागृह, मॉल पूर्णपणे बंद राहणार
- हॉटेल्समध्ये फक्त पार्सल सेवा सुरू राहणार
- सकाळी 5 ते 9 यावेळेत सार्वजनिक उद्याने, मैदाने, वॉकिंग ट्रॅक, सायकलिंग ट्रॅक सुरू राहणार (सोमवार ते शुक्रवार)
- अत्यावश्यक सेवेतील खासगी कार्यालयात फक्त 25 टक्के उपस्थिती तर शासकीय कार्यालयात 25 टक्के उपस्थिती राहणार
- 25 लोकांच्या उपस्थितीत लग्न सोहळा आणि 20 लोकांच्या उपस्थितीत अंत्यसंस्कार कार्यक्रम करणे बंधनकारक
- राजकीय किंवा इतर बैठका 50 टक्के क्षमता राहील
- कामगारांच्या राहण्याची सोय असलेल्या ठिकाणी बांधकामे सुरू राहणार
- दुपारी 2 वाजेपर्यंत (सोमवार ते शुक्रवार) कृषी कामे सुरू राहणार
हेही वाचा - अंडरवर्ल्ड डाॅन दाऊद इब्राहिमची ओळख सांगत व्याजाच्या वसुलीसाठी जिवे मारण्याची धमकी
