पणजी - गोव्यात विधानसभा निवडणुकीसाठी 40 जागांसाठी 14 फेब्रुवारीला मतदान प्रक्रिया पार पडली आहे. या निवडणुकीकडे संपूर्ण देशाचे लक्ष लागून आहे. सर्वच राजकीय पक्षांच्या प्रतिष्ठा पणाला लागल्या आहेत. 10 मार्चला म्हणजे उद्या निकाल लागणार आहे. 40 जागांसाठी झालेल्या या मतदान प्रक्रियेत 301 उमेदवारांचे भवितव्य ठरणार ( Goa Assembly Election Result 2022 ) आहे. गोवा विधानसभा निवडणुकीत आम आदमी पक्ष उतरला आहे. निवडणुकीत 'आप' हा एक महत्त्वाचा फॅक्टर मानला जातो आहे. 2017 मध्ये विधानसभा निवडणुकीत 'आप'नं गोव्याच्या राजकारणात प्रवेश केला आणि 39 जागांवर निवडणूक लढवली. पण सगळीकडे त्यांचा पराभव झाला होता. मात्र, यंदा 'आप' गोव्यात महत्त्वाची भूमिका निभावेल, असे अंदाज व्यक्त केले जात आहेत. गोव्याच्या मुख्यमंत्रिपदाचे उमेदवार म्हणून अमित पालेकर यांचं ( Amit Palekar is the face of Chief Minister by AAP ) नाव आम आदमी पक्षानं जाहीर केलं. अमित पालेकर हे आम आदमी पक्षाचे मुख्यमंत्रीपदाचे उमेदवार आहेत. ते व्यवसायाने वकील असून ते भंडारी समाजातून येतात. गोव्यात लोकसंख्येच्या जवळपास 35 टक्के असणाऱ्या या भंडारी समाजातून गोव्यात आजवर केवळ एक मुख्यमंत्री झाला आहे.
अमित पालेकर हे गोव्यात प्रसिद्ध राजकारणी आहेत. ते व्यवसायाने वकील आहेत. पण सामाजिक कार्यकर्ता म्हणून त्यांची बरीच ओळख आहे. भ्रष्टाचाराचा मुद्दावर ते नेहमीच मांडत आले आहेत. पालेकर हे गोव्यातील सांताक्रूझ परिसरात राजकारणात दीर्घकाळापासून सक्रिय आहेत. 2017 पासून ते आम आदमी पक्षाशी संबंधित असले तरी त्यांच्यासाठी राजकारण नवीन नाही. त्यांची आई दहा वर्षे सरपंच होत्या.
कोरोनाकाळात लोकांना मदत -
अमित पालेकर यांनी कोरोनाच्या काळात लोकांना खूप मदत केली. देशभरातील रुग्णालयांमध्ये खाटांची कमतरता असताना पालेकर यांनी स्वत:हून 135 खाटा स्थानिक रुग्णालयाला दान केल्या होत्या. रुग्णांना उपचार देण्यासोबतच त्यांनी लॉकडाऊनमध्ये प्रवास करणाऱ्या कुटुंबांनाही मदत केली होती.
